جاز ورلڈ کی آمدنی 23 فیصد بڑھ گئی، پہلی ششماہی میں 269 ارب روپے ریکارڈ

جاز ورلڈ کی آمدنی 2026 کی پہلی ششماہی میں 269 ارب روپے رہی جو گزشتہ سال کی اسی مدت کے مقابلے میں 23 فیصد زیادہ ہے۔ آمدنی میں یہ مضبوط اضافہ ٹیلی کمیونیکیشن، انفرااسٹرکچر اور ڈیجیٹل سروسز کے شعبوں میں نمایاں نمو کے باعث ہوا۔

ایک بیان کے مطابق کمپنی نے نیٹ ورک کی گنجائش بڑھانے، حال ہی میں حاصل کیے گئے اسپیکٹرم کو بروئے کار لانے اور پاکستان کے ڈیجیٹل انفراسٹرکچر کو مزید مضبوط بنانے کے لیے 29.2 ارب روپے کی سرمایہ کاری کی۔

دوسری سہ ماہی میں آمدنی سالانہ بنیاد پر 25.3 فیصد بڑھ کر 139.4 ارب روپے ہوگئی۔ ٹیلی کام اور انفرااسٹرکچر سے حاصل ہونے والی آمدنی 15.8 فیصد اضافے سے 85.5 ارب روپے رہی جس میں بہتر قیمتوں کے تعین، پری پیڈ صارفین سے آمدنی میں اضافے، ملٹی پلے آفرز اور ڈیٹا کے زیادہ استعمال نے اہم کردار ادا کیا۔

اپنی DO1440 اور AI1440 حکمتِ عملی کے تحت ڈیجیٹل آمدنی سالانہ بنیاد پر 44.1 فیصد بڑھ کر 53.9 ارب روپے ہوگئی جو اب کمپنی کی کل آمدنی کا 38.7 فیصد بنتی ہے۔

بیان کے مطابق مالیاتی خدمات سے حاصل ہونے والی آمدنی سالانہ بنیاد پر 53.3 فیصد بڑھ کر 39 ارب روپے ہوگئی جس میں جاز کیش کی قرضہ جاتی خدمات، ادائیگیوں اور چھوٹے و درمیانے کاروباری اداروں کے لیے حل نے اہم کردار ادا کیا۔ EBITDA بھی سالانہ بنیاد پر 30.5 فیصد اضافے سے 60.3 ارب روپے ہوگیا۔

جاز کے موبائل صارفین کی تعداد 7 کروڑ 54 لاکھ تک پہنچ گئی۔ فور جی صارفین کی تعداد سالانہ بنیاد پر 6.6 فیصد اضافے سے 5 کروڑ 81 لاکھ ہوگئی جبکہ فی صارف ڈیٹا کے استعمال میں 14.4 فیصد اضافہ ہوا اور یہ 8.2 جی بی تک پہنچ گیا۔ جاز کیش نے 6 کروڑ صارفین کو خدمات فراہم کیں جبکہ مجموعی لین دین کی مالیت سالانہ بنیاد پر 67.5 فیصد بڑھ کر 19.6 ٹریلین روپے ہوگئی۔

ٹی پی ایل انشورنس میں 76.33 فیصد حصص کی خریداری کے بعد جاز ورلڈ ملک بھر میں ڈیجیٹل انشورنس تک رسائی کو وسعت دے گا۔

جاز ورلڈ کے سی ای او عامر ابراہیم نے کہا کہ ہماری حکمت عملی ایک انٹیلی جنس پر مبنی سروس کو تشکیل دینا ہے جو صارفین اور پاکستان کی ڈیجیٹل معیشت کے لیے قدر پیدا کرنے کے لیے کنیکٹیویٹی اے آئی اور مالیاتی خدمات کو یکجا کرتی ہے۔