ڈالر کے مقابلے میں روپیہ مزید مضبوط

انٹربینک مارکیٹ میں جمعہ کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی بہتری سے 277.80 روپے پر بند ہوا۔

یاد رہے کہ جمعرات کو مقامی کرنسی 277.81 روپے پر بند ہوئی تھی۔

عالمی منڈی میں جمعہ کو ابتدائی کاروبار کے دوران امریکی ڈالر جاپانی ین کے مقابلے میں 0.8 فیصد تک مضبوط ہو کر 160.690 ین کی سطح پر پہنچ گیا۔ یہ اضافہ گزشتہ کاروباری سیشن میں ڈالر کی 2.4 فیصد کی بڑی گراوٹ کے بعد سامنے آیا، جو جنوری 2023 کے بعد ایک ہی روز میں اس کی سب سے بڑی کمی تھی۔

رائٹرز کو مارکیٹ ذرائع نے بتایا کہ جاپان نے رات گئے نیویارک سیشن کے دوران ین کی خریداری اور امریکی ڈالر کی فروخت کے ذریعے مارکیٹ میں مداخلت کی جس کے نتیجے میں کمزور پڑنے والی جاپانی کرنسی چار دہائیوں کی کم ترین سطح سے سنبھل گئی۔

رائٹرز کو ایک مارکیٹ ذرائع نے بتایا کہ ایک غیر معمولی مربوط اقدام کے تحت جنوبی کوریا نے بھی جمعرات کو امریکی ڈالر فروخت کرکے اپنی کرنسی کی حمایت کے لیے مارکیٹ میں مداخلت کی۔

جنوبی کوریا کی کرنسی وون پہلے بڑھ کر نو ماہ کی بلند ترین سطح پر پہنچ گئی تاہم بعد ازاں اس نے اپنی کچھ بڑھت کھودی۔ ابتدائی کاروبار کے دوران وون امریکی ڈالر کے مقابلے میں 1,434.26 کی سطح پر ٹریڈ کر رہا تھا،جو 0.7 فیصد سے زائد کمی کو ظاہر کرتا ہے۔