کرکٹ "بین الاقوامی اولمپک کمیٹی" کے لیے بھارت تک رسائی کا ذریعہ کیسے بن سکتی ہے؟

2028 کے لاس اینجلس اولمپکس میں 128 سال بعد کرکٹ کی واپسی صرف ایک کھیل کی شمولیت نہیں بلکہ عالمی اولمپک قیادت کی ایک سوچی سمجھی تجارتی حکمت عملی ہے۔

آئی او سی کے حکام کے مطابق اربوں نئے ناظرین تک رسائی کا سب سے بہترین راستہ بھارت سے ہو کر گزرتا ہے، جو نہ صرف کرکٹ کا تجارتی مرکز ہے بلکہ کھیل کی دنیا کا ایک ابھرتا ہوا پاور ہاؤس بھی ہے۔کرکٹ کے ٹی ٹوئنٹی فارمیٹ نے 2 ارب سے زائد مداحوں کی منڈی اور بھارتی مارکیٹ کا بڑا دروازہ اولمپکس کے لیے کھول دیا ہے۔ رپورٹس کے مطابق 2024 کے پیرس اولمپکس کے مقابلے میں لاس اینجلس 2028 کے لیے برصغیر میں براڈکاسٹنگ رائٹس کی قیمت ملٹیپل گنا بڑھنے کی توقع ہے، جس کے لیے جیو اسٹارجیسے بڑے میڈیا گروپس میدان میں ہیں۔

آئی او سی کے اسپورٹس ڈائریکٹر پیرے ڈوکرے اور آئی سی سی کے چیف ایگزیکٹو سنجوگ گپتا کا کہنا ہے کہ ٹی ٹوئنٹی کی تیز رفتار اور سنسنی خیز نوعیت اولمپک تحریک کے اہداف سے مکمل ہم آہنگ ہے۔ تقریباً 21 سال کی کوششوں کے بعد کرکٹ کی یہ واپسی اولمپکس کو ایک نیا اور متحرک عالمی ناظرین کا طبقہ فراہم کرے گی۔