دفاعی روابط مضبوط بنانے کے لیے فیلڈ مارشل سید عاصم منیر کا دورۂ ترکیہ

چیف آف ڈیفنس فورسز فیلڈ مارشل سید عاصم منیر دونوں ممالک کے مابین دیرینہ اسٹریٹجک اور دفاعی تعلقات کو مزید مضبوط بنانے کے لیے ترکیہ کے سرکاری دورے پر ہیں۔

آئی ایس پی آر کے مطابق فیلڈ مارشل عاصم منیر نے ترکیہ کے صدر رجب طیب اردوان، وزیرِ دفاع یاشار گولر اور ترک جنرل اسٹاف کے سربراہ جنرل سلجوق بائرکتار اوغلو سے علیحدہ علیحدہ ملاقاتیں کیں، جن میں باہمی دلچسپی کے امور، علاقائی سلامتی اور دوطرفہ فوجی تعاون کو بڑھانے کے طریقوں پر تبادلہ خیال کیا گیا۔

ترک جنرل اسٹاف ہیڈ کوارٹرز پہنچنے پر فیلڈ مارشل کو گارڈ آف آنر پیش کیا گیا، جس کے بعد انہوں نے جنرل بائرکتار اوغلو کے ساتھ علاقائی سلامتی کی صورتحال اور پیشہ ورانہ فوجی امور پر تفصیلی بات چیت کی۔

آئی ایس پی آر کے مطابق دورے کے دوران جنرل بائرکتار اوغلو نے پاکستان اور ترکیہ کے مابین دفاعی تعاون کو مضبوط بنانے کے لیے فیلڈ مارشل عاصم منیر کی خدمات اور عزم کے اعتراف میں انہیں ترک مسلح افواج کے ممتاز خدمتی تمغے (ڈسٹنگوئشڈ سروس میڈل) سے نوازا۔

فیلڈ مارشل نے ترک لینڈ فورسز ہیڈ کوارٹرز کا بھی دورہ کیا، جہاں انہوں نے ترک لینڈ فورسز کے کمانڈر جنرل متین توکیل سے ملاقات کی۔ اس کے علاوہ انہوں نے جدید ترکیہ کے بانی مصطفیٰ کمال اتاترک کے مزار اناط کبیر پر حاضری دی اور انہیں خراجِ عقیدت پیش کرنے کے لیے پھولوں کی چادر چڑھائی۔

آئی ایس پی آر کا کہنا تھا کہ یہ دورہ دونوں ممالک کے مابین کثیر الجہتی دفاعی شراکت داری کو مزید گہرا کرنے اور علاقائی امن و استحکام کے لیے مشترکہ کوششیں جاری رکھنے کے مشترکہ عزم کا عکاس ہے۔