بھارت میں موسلا دھار بارشیں، دہلی میں عمارت گرنے سے 4 افراد ہلاک

بھارتی دارالحکومت دہلی میں عمارت گرنے سے کم از کم چار افراد ہلاک ہو گئے۔ یہ واقعہ مون سون کی بارشوں کے باعث پیش آنے والے ان واقعات کی تازہ ترین کڑی ہے جن کے نتیجے میں ملک کے مختلف حصوں میں لینڈ سلائیڈنگ کے واقعات ہوئے اور سفری نظام درہم برہم ہو گیا ہے۔

خبر رساں ادارے اے این آئی کے مطابق دہلی میں عمارت کے ملبے سے ایک شخص کو زندہ نکال لیا گیا ہے۔

بھارت کے محکمہ موسمیات نے دہلی کے کچھ حصوں اور پڑوسی ریاست ہریانہ کے لیے ریڈ الرٹ جاری کر دیا ہے جس میں شدید بارش کی پیش گوئی کی گئی ہے۔

دہلی ایئرپورٹ نے مسافروں کو مشورہ دیا ہے کہ وہ سفر کے لیے اضافی وقت لے کر نکلیں، کیونکہ ایئرپورٹ جانے والی کچھ سڑکوں پر پانی جمع ہو گیا ہے۔

مقامی میڈیا کے مطابق جنوبی ریاست کیرالہ کے ضلع وائناڈ میں منگل کو لینڈ سلائیڈنگ کے نتیجے میں کم از کم چار افراد ہلاک ہو گئے تھے۔

ریاست مہاراشٹر کے ایک حکومتی وزیر نے اس ہفتے کے اوائل میں بتایا کہ ریاست کے مغربی حصے میں بارش سے متعلق واقعات میں کم از کم 13 افراد ہلاک ہوچکے ہیں۔

پونے میں کچرے کو ٹھکانے لگانے والی ایک تنصیب پر کوڑے کا ایک بڑا ڈھیر گرگیا، اب تک کم از کم سات افراد کو بچا لیا گیا ہے جبکہ نو دیگر افراد کے ملبے تلے دبے ہونے کا خدشہ ہے۔