اورمارا کے قریب کے ٹو ائیرویز کے مال بردار طیارے کا ملبہ مل گیا، 12 گھنٹے کا سرچ آپریشن مکمل

پاکستان ایئرپورٹس اتھارٹی نے بتایا ہے کہ تقریباً 12 گھنٹے کے شدید سرچ اینڈ ریسکیو آپریشن کے بعد لاپتہ ہونے والے کے ٹو ائیرویز کے کارگو بوئنگ 737 طیارے کا ملبہ بحیرہ عرب سے مل گیا ہے۔

ایک سرکاری بیان کے مطابق پاکستان نیوی اور پاکستان میری ٹائم سیکیورٹی ایجنسی (پی ایم ایس اے) نے کارگو طیارے کے ملبے کو کامیابی سے تلاش اور اس کی شناخت کر لی ہے، جسے منگل کی دیر رات لاپتہ قرار دیا گیا تھا۔ طیارے کا ملبہ اورمارا کے جنوب میں تقریباً 53 ناٹیکل میل کے فاصلے سے برآمد ہوا۔

تلاشی کے اس آپریشن میں پاکستان نیوی اور پی ایم ایس اے کی جانب سے گہرے سمندر میں طیارے کا سراغ لگانے کے لیے متعدد فضائی اور بحری اثاثے تعینات کیے گئے تھے۔ ریسکیو ٹیمیں لاپتہ عملے کے ارکان کی تلاش کے لیے کوششیں جاری رکھے ہوئے ہیں، جبکہ حکام کا کہنا ہے کہ سرچ اینڈ ریسکیو آپریشن آگے بڑھنے کے ساتھ ہی مزید تفصیلات شیئر کی جائیں گی۔

کارگو بوئنگ 737 طیارہ شارجہ سے کراچی آتے ہوئے نیویگیشن سسٹم میں خرابی کی اطلاع دینے کے بعد لاپتہ ہو گیا تھا۔ ایئر ٹریفک کنٹرولرز نے خرابی کی اطلاع ملنے پر طیارے کی رہنمائی کی، لیکن بعد میں راڈار نے دکھایا کہ کراچی کے مغرب میں رابطہ منقطع ہونے سے قبل طیارہ تیزی سے نیچے کی طرف گر رہا تھا۔