افغانستان کے سابق فاسٹ باؤلر شاپور زدران انتقال کر گئے، عمر 38 برس تھی
- شاپور زدران نے 2009 میں ایک روزہ بین الاقوامی (ون ڈے) کرکٹ میں ڈیبیو کیا تھا اور مختلف فارمیٹس میں افغانستان کی جانب سے مجموعی طور پر 80 بین الاقوامی میچز کھیلے تھے
افغانستان کے سابق فاسٹ باؤلر شاپور زدران منگل کو اپنی 39ویں سالگرہ سے ایک روز قبل انتقال کر گئے۔ اطلاعات کے مطابق وہ نئی دہلی کے ایک اسپتال میں مدافعتی نظام کی ایک نایاب اور شدید بیماری کا علاج کروا رہے تھے۔
افغانستان کرکٹ بورڈ (اے سی بی) نے ایکس پر جاری بیان میں کہا، ”انتہائی رنج و غم کے ساتھ افغانستان کرکٹ بورڈ اپنے سابق فاسٹ باؤلر شاپور زدران کے انتقال پر گہرے دکھ کا اظہار کرتا ہے۔“
افغانستان کرکٹ بورڈ نے اپنے بیان میں کہا، ”شاپور زدران افغانستان کرکٹ کی بنیاد رکھنے والی اہم شخصیات میں شامل تھے۔ ان کی لگن، جذبے اور غیرمتزلزل عزم نے ملک میں کرکٹ کے فروغ اور ترقی میں کلیدی کردار ادا کیا۔“
شاپور زدران نے 2009 میں ایک روزہ بین الاقوامی (ون ڈے) کرکٹ میں ڈیبیو کیا تھا اور مختلف فارمیٹس میں افغانستان کی جانب سے مجموعی طور پر 80 بین الاقوامی میچز کھیلے، جن میں 44 ون ڈے اور 36 ٹی ٹوئنٹی انٹرنیشنل میچ شامل ہیں۔
بائیں ہاتھ کے اس فاسٹ باؤلر نے افغانستان کی کرکٹ تاریخ کے یادگار لمحات میں بھی اہم کردار ادا کیا۔ انہوں نے 2015 کے ورلڈ کپ میں اسکاٹ لینڈ کے خلاف افغانستان کی پہلی ورلڈ کپ فتح کے دوران فاتحانہ چوکا لگا کر ٹیم کو تاریخی کامیابی دلائی۔
Comments