'آؤ نوحہ کریں'، خامنہ ای کو الوداع کہنے ایرانی امڈ آئے

ہزاروں ایرانی ہفتے کے روز تہران کے امام خمینی گرینڈ مصلیٰ میں جمع ہوئے تاکہ آیت اللہ علی خامنہ ای کے تابوت کی آخری جھلک دیکھ سکیں۔ آیت اللہ خامنہ ای نے 37 برس تک اسلامی جمہوریہ ایران کی قیادت کی تھی اور وہ امریکہ اور اسرائیل کی جانب سے ایران کے خلاف شروع کی گئی جنگ کے ابتدائی فضائی حملوں میں شہید ہوئے تھے۔

سیاہ لباس میں ملبوس اور ایران کے سرخ، سفید اور سبز پرچموں میں لپٹے سوگواروں نے آیت اللہ خامنہ ای اور ان کے جانشین و موجودہ سپریم لیڈر مجتبیٰ خامنہ ای کی تصاویر والے بینرز اور پوسٹر اٹھا رکھے تھے۔

ایران نے آیت اللہ خامنہ ای کے لیے بڑے پیمانے پر الوداعی تقریبات کا اہتمام کیا، جنہیں امریکہ اور اسرائیل کی جانب سے فروری میں شروع کیے گئے جنگی فضائی حملوں میں شہید کیا گیا تھا۔ ان تقریبات کا مقصد اسلامی جمہوریہ کے مذہبی نظام اور انقلابی نظریے سے عوامی وابستگی کا اظہار تھا۔

ایرانی اور غیر ملکی اعلیٰ شخصیات کی جانب سے اندرونِ ہال الوداعی خراجِ عقیدت پیش کیے جانے کے بعد آیت اللہ خامنہ ای اور اسی فضائی حملے میں جاں بحق ہونے والے ان کے کئی اہلِ خانہ کے تابوت عوامی دیدار کے لیے کھلے میدان میں قائم اسٹیج پر منتقل کیے گئے، جہاں لوگ فاصلے سے ان کی آخری جھلک دیکھتے رہے۔

سوگوار امام خمینی گرینڈ مصلیٰ کے وسیع صحن میں داخل ہوتے رہے، سینہ زنی کرتے، نوحہ خوانی کرتے اور اسلامی جمہوریہ ایران اور شیعہ تاریخ کے شہداء کے پرچم لہراتے رہے۔ سیاہ چادروں میں ملبوس خواتین نے دھوپ سے بچنے کے لیے سفید نقاب نما چھجے پہن رکھے تھے یا چھتریاں تھام رکھی تھیں۔

لاؤڈ اسپیکر پراعلان کرنے والے نے مجمع سے مخاطب ہو کر کہا، ”آؤ نوحہ کریں!“ پھر اس نے نعرہ لگایا، ”سب مل کر کہیں: مظلوم!“ اور ”سب پکاریں: حسینؑ!“ یوں اس نے شیعہ مذہبی روایت میں قربانی اور شہادت کی علامتوں کو یاد کیا۔

ایرانی سرکاری میڈیا کے مطابق اس اسرائیلی حملے میں آیت اللہ خامنہ ای کے علاوہ ان کی بیٹی، نواسے/نواسی، بہو اور داماد بھی شہید ہوئے تھے۔

ان پانچوں کے تابوت ایرانی پرچموں میں لپٹے ہوئے ایک بلند چبوترے پر رکھے گئے تھے، جن میں 14 ماہ کی نواسی کا ایک چھوٹا تابوت بھی شامل تھا۔

ایران کی فوج اور سکیورٹی اداروں نے آیت اللہ خامنہ ای کی شہادت کا بدلہ لینے کے عزم کا اظہار کیا، جبکہ سرکاری نشریاتی ادارے صدا و سیما کے مطابق مصلیٰ میں ”امریکہ مردہ باد“ کے نعرے بھی گونجتے رہے۔

تباہ کن جنگ، مگر امن تاحال دور

آیت اللہ علی خامنہ ای کی الوداعی تقریبات ایسے وقت میں ہوئیں جب ایران ایک نہایت نازک مرحلے سے گزر رہا تھا۔ اسلامی پاسدارانِ انقلاب (آئی آرجی سی) کی حمایت یافتہ مذہبی قیادت اپنے طاقتور ترین مخالفین کے خلاف لڑی جانے والی اس جنگ میں بچ نکلنے کو اپنی بڑی کامیابی قرار دے رہی تھی، جسے وہ اپنے وجود کی بقا کی جنگ سمجھتی تھی۔

تاہم تجزیہ کاروں کے مطابق قومی یکجہتی اور عوامی عقیدت کے مظاہروں کے باوجود اسلامی جمہوریہ کے لیے عوامی حمایت انتہائی کمزور ہو چکی ہے۔

آیت اللہ خامنہ ای کے جانشین مجتبیٰ خامنہ ای، جو طویل عرصے سے اسلامی پاسدارانِ انقلاب کی اعلیٰ قیادت کے قریب سمجھے جاتے ہیں، اپنے والد پر ہونے والے حملے میں زخمی ہونے کے بعد سے کسی نئی عوامی تصویر میں نظر نہیں آئے۔

28 فروری کو آیت اللہ خامنہ ای کی ہلاکت سے شروع ہونے والی جنگ کے دوران امریکہ اور اسرائیل نے ایران میں فوجی اہداف، توانائی تنصیبات اور شہری انفرااسٹرکچر پر ہزاروں فضائی حملے کیے۔ ایرانی سرکاری میڈیا کے مطابق ان حملوں میں تین ہزار سے زائد افراد جاں بحق ہوئے۔

جواب میں ایران نے امریکی فوجی اڈوں کو نشانہ بنایا، اسرائیل کی جانب میزائل داغے، خلیجی عرب ممالک میں توانائی کے متعدد مراکز پر حملے کیے اور آبنائے ہرمز میں تیل بردار جہازوں کی آمدورفت بھی شدید متاثر کی۔ ان حملوں میں کم از کم 13 امریکی فوجی ہلاک ہوئے۔

اس جنگ کے اثرات پورے خطے میں پھیل گئے اور ہزاروں مزید افراد جان کی بازی ہار گئے، خصوصاً لبنان میں، جہاں اسرائیل ایران کی حمایت یافتہ حزب اللہ کے خلاف کارروائیاں جاری رکھے ہوئے ہے۔ اسرائیلی حملوں اور مسماری کی کارروائیوں سے جنوبی لبنان کے وسیع شہری علاقے تباہ ہو گئے۔

امریکہ اور ایران کے درمیان اپریل کے آغاز میں ایک غیر مستحکم جنگ بندی عمل میں آئی، جبکہ جون میں لڑائی روکنے کے لیے ایک ابتدائی معاہدہ بھی طے پایا، تاہم اس کے باوجود وقفے وقفے سے دونوں جانب سے محدود حملے جاری رہے۔

امریکہ اور ایران کے درمیان جاری کشیدگی، ایران کے اتحادیوں کے خلاف اسرائیل کی جنگوں اور فلسطینیوں کے خلاف اس کی فوجی کارروائیوں کے ساتھ مل کر مشرقِ وسطیٰ کو مسلسل عدم استحکام سے دوچار رکھے ہوئے ہے۔

مبصرین کا کہنا ہے کہ اس جنگ میں ایران کے کئی اعلیٰ فوجی اور سکیورٹی عہدیداروں کی ہلاکت کے بعد ملک میں سخت گیر عناصر مزید مضبوط ہو گئے ہیں، جو مرحوم آیت اللہ خامنہ ای کے مقابلے میں اپنے مخالفین کے خلاف براہِ راست فوجی کارروائیوں کے زیادہ حامی سمجھے جاتے ہیں۔

شیعہ تصورِ شہادت

ایران کے مذہبی و سیاسی نظام میں آیت اللہ علی خامنہ ای صرف ریاست کے سربراہ اور انقلابی تحریک کے قائد ہی نہیں تھے بلکہ انہیں شیعہ اسلام کے بارہویں امام کے زمینی نمائندے کی حیثیت بھی حاصل تھی، جن کے بارے میں عقیدہ ہے کہ وہ نویں صدی میں پردۂ غیبت میں چلے گئے تھے۔

دشمن کے حملے میں ان کا قتل شیعہ مذہبی روایت میں شہادت اور سوگواری کے تصور کو مزید تقویت دیتی ہے۔

جمعرات کی شب آیت اللہ خامنہ ای کے تابوت کی پہلی مرتبہ عوام کو زیارت کرائی گئی، جبکہ جمعے کو اسے ان کے پیش رو آیت اللہ روح اللہ خمینی کی یاد میں تعمیر کیے گئے عظیم مصلیٰ میں عوامی دیدار کے لیے رکھا گیا۔

تابوت اتوار کی شام تک امام خمینی گرینڈ مصلیٰ میں رکھا گیا ہے۔

اگرچہ اسلامی تعلیمات کے مطابق میت کو جلد از جلد سپردِ خاک کیا جاتا ہے، تاہم جنگ کے دوران بڑے عوامی جنازے کے سکیورٹی خدشات کے باعث تدفین مؤخر کر دی گئی تھی اور گزشتہ ماہ عبوری جنگ بندی طے پانے کے بعد الوداعی تقریبات کا انعقاد ممکن ہو سکا۔

حکام کے مطابق پیر کو تہران میں ایک بڑے جلوس جنازہ کے بعد آیت اللہ خامنہ ای کے جسدِ خاکی کو ایران کے مذہبی شہر قم منتقل کیا گیا، جو شیعہ دینی قیادت کا مرکز سمجھا جاتا ہے، جہاں منگل کو خصوصی تقریبات منعقد ہوئیں۔

اس کے بعد بدھ کو عراق کے مقدس شہروں نجف اور کربلا میں بھی تعزیتی تقریبات منعقد کی گئیں، جن میں ایران کے علاقائی اتحادی شیعہ گروہوں کی نمایاں شخصیات نے شرکت کی۔

بعد ازاں جمعرات کو ایک اور جلوس جنازہ کے بعد انہیں مشہد میں امام رضاؑ کے روضے کے قریب سپردِ خاک کر دیا گیا۔

حکام نے الوداعی تقریبات میں لاکھوں افراد کی شرکت یقینی بنانے کے لیے ٹرانسپورٹ، خوراک اور رہائش سمیت مختلف سہولتوں کا انتظام کیا، تاکہ نو کروڑ سے زائد آبادی والے ملک کے زیادہ سے زیادہ شہری ان تقریبات میں شریک ہو سکیں۔