پاکستان ترکیہ تعلقات کو مزید مستحکم بنانے کے لیے وزیراعظم شہباز شریف استنبول پہنچ گئے

وزیراعظم شہباز شریف جمعہ کو صدر رجب طیب اردوان کی دعوت پر دوطرفہ دورے پر ترکیہ کے شہر استنبول پہنچ گئے، جہاں دونوں رہنما تجارت، سرمایہ کاری اور دیگر مختلف شعبوں میں تعاون کو مزید فروغ دینے کے طریقوں پر تبادلۂ خیال کریں گے۔

وزیراعظم آفس کے مطابق استنبول کے اتاترک ہوائی اڈے پر ترکیہ کے وزیر تجارت پروفیسر ڈاکٹر عمر بولات، ترکیہ میں پاکستان کے سفیر ڈاکٹر یوسف جنید، ترک وزارت خارجہ اور پاکستانی سفارت خانے کے اعلیٰ حکام نے وزیراعظم کا استقبال کیا۔

اس دورے میں وزیراعظم کے ہمراہ نائب وزیراعظم و وزیر خارجہ اسحاق ڈار اور وفاقی وزیر اطلاعات عطا اللہ تارڑ بھی ہیں۔

وزیراعظم آفس کے مطابق وزیراعظم شہباز شریف اور صدر اردوان کی ملاقات میں دوطرفہ تعلقات کے تمام پہلوؤں پر جامع بات چیت ہوگی، جس میں بالخصوص تجارت اور سرمایہ کاری کے شعبوں میں تعاون بڑھانے پر توجہ دی جائے گی۔ دونوں رہنما علاقائی امن و سلامتی سے متعلق امور پر بھی تبادلۂ خیال کریں گے۔

استنبول میں اپنے دورے کے دوران وزیراعظم پاکستان کے زیر اہتمام منعقد ہونے والی ایک کاروباری کانفرنس سے بھی خطاب کریں گے، جس کا مقصد ملک میں سرمایہ کاری کے مواقع اجاگر کرنا ہے۔

کانفرنس میں خصوصی اقتصادی زونز (ایس ای زیڈز)، توانائی، انفارمیشن ٹیکنالوجی، نجکاری اور دیگر اہم شعبوں میں سرمایہ کاری کے امکانات پیش کیے جائیں گے۔ اس میں ترکیہ کے ممتاز کاروباری رہنما، سرمایہ کار، اعلیٰ سرکاری حکام اور دیگر اہم شخصیات کی شرکت متوقع ہے۔

پاکستان اور ترکیہ کے درمیان سیاسی، اقتصادی اور دفاعی شعبوں میں قریبی تعلقات قائم ہیں، اور دونوں ممالک مختلف شعبوں میں اپنے اسٹریٹجک تعاون کو مزید وسعت دینے کے عزم کا اعادہ کرتے رہے ہیں۔