امن مذاکرات میں پیش رفت کی امید، سونے کی قیمتوں میں اضافہ

عالمی مارکیٹ میں پیر کے روز سونے کی قیمتوں میں ایک فیصد سے زائد اضافہ دیکھنے میں آیا، جس کی وجہ برینٹ کروڈ تیل کی قیمتوں میں کمی اور امریکا ایران امن مذاکرات میں پیش رفت سے افراطِ زر اور شرحِ سود میں اضافے کے خدشات میں کمی قرار دی جا رہی ہے۔

اسپاٹ گولڈ 1.2 فیصد اضافے کے ساتھ 4,209.03 ڈالر فی اونس پر ٹریڈ کرتا رہا، جبکہ اگست کے لیے امریکی گولڈ فیوچرز 0.5 فیصد کمی کے ساتھ 4,225.80 ڈالر پر آ گئے۔ مارکیٹ ماہرین کے مطابق سرمایہ کاروں نے محفوظ سرمایہ کاری کے طور پر دوبارہ سونے کی طرف رجوع کیا ہے۔

ایرانی وزارت خارجہ کے ترجمان کے مطابق سوئٹزرلینڈ میں ہونے والے کواڈریلیٹرل مذاکرات میں اہم پیش رفت ہوئی ہے، جس کی وجہ سے توانائی کی سپلائی میں خلل اور مہنگائی کے خدشات کم ہوئے ہیں۔ اسی دوران امریکا اور ایران کے درمیان مذاکرات دوسرے روز میں داخل ہوگئے ہیں، جو ایک عبوری امن معاہدے کے تحت جاری ہیں۔

دوسری جانب امریکی فیڈرل ریزرو کے چیئر کے سخت موقف کے باعث بانڈ ییلڈز میں اضافہ ہوا ہے، جبکہ سرمایہ کاروں کی اکثریت شرحِ سود میں فوری کمی کی توقعات کو محدود کر رہی ہے۔

عالمی سطح پر سونے کی طلب میں بھی ملا جلا رجحان دیکھا گیا ہے۔ بھارت میں قیمتوں میں کمی کے باوجود طلب کم رہی جبکہ چین میں ڈسکاؤنٹ کے باعث خریداری محدود رہی۔ سوئس گولڈ ایکسپورٹس میں بھی 9 فیصد کمی ریکارڈ کی گئی۔

چاندی کی قیمت 2.6 فیصد اضافے کے ساتھ 66.60 ڈالر فی اونس تک پہنچ گئی، جبکہ پلاٹینم اور پیلیڈیم کی قیمتوں میں بھی بالترتیب 1.3 اور 1.5 فیصد اضافہ دیکھا گیا۔