الیکٹرانک وسائل پر سرمایہ کاری: 10 فیصد ٹیکس کریڈٹ متعارف

فنانس بل 2026 میں الیکٹرانک وسائل میں کی جانے والی سرمایہ کاری پر 10 فیصد ٹیکس کریڈٹ متعارف کرایا گیا ہے جو ایف بی آر کے کمپیوٹرائزڈ سسٹمز کے ساتھ انضمام کے لیے کیا جائے گا تاکہ ڈیجیٹل تعمیل کو فروغ دیا جا سکے۔

غیر ملکی ٹیلی وژن ڈراموں اور اشتہارات کی ادائیگیوں پر عائد ایڈوانس ٹیکس ختم کر دیا گیا ہے۔

وفاقی حکومت نے بجٹ (27-2026) میں انکم ٹیکس آرڈیننس 2001 کے تحت کئی ریلیف، محصولات اور انتظامی اقدامات تجویز کیے ہیں۔ ان میں تنخواہ دار افراد کے لیے ٹیکس کی شرح میں کمی، غیر منقولہ جائیداد سے حاصل ہونے والی تصوراتی آمدنی پر ٹیکس کا خاتمہ اور سپر ٹیکس کو معقول بنانا شامل ہیں۔

مجوزہ ریلیف اقدامات کے تحت ٹیکس سلیبز کی تنظیم نو کے ذریعے تنخواہ دار ٹیکس دہندگان کے لیے انکم ٹیکس کی شرح میں کمی کی گئی ہے۔ اس میں مزید درمیانی سلیبز متعارف کرائی گئی ہیں جب کہ 35 فیصد کی سب سے زیادہ ٹیکس شرح کے لیے حد کو 4.1 ملین روپے سے بڑھا کر 7 ملین روپے کر دیا گیا ہے۔

حکومت نے سیکشن 7 ای کے خاتمے کی بھی تجویز دی ہے جو پاکستان میں موجود سرمایہ جاتی اثاثوں سے حاصل شدہ فرضی آمدن پر ٹیکس سے متعلق ہے۔ اس اقدام کے نتیجے میں غیر منقولہ جائیداد سے حاصل شدہ فرضی آمدن پر ٹیکس عملاً ختم ہو جائے گا۔