آبنائے ہرمز کے قریب گرنے والے امریکی ہیلی کاپٹر کے پائلٹ محفوظ ہیں، ٹرمپ

امریکی صدر ڈونلڈ ٹرمپ نے کہا ہے کہ آبنائے ہرمز کے قریب حادثے کا شکار ہونے والے امریکی فوجی ہیلی کاپٹر کے دونوں پائلٹ محفوظ ہیں اور کسی کو کوئی چوٹ نہیں آئی۔

میڈیا رپورٹس کے مطابق ایک امریکی اپاچی گن شپ ہیلی کاپٹر ایرانی کنٹرول والے آبی راستے کے قریب گر کر تباہ ہو گیا تھا، تاہم اس کے عملے کو بحفاظت نکال لیا گیا۔ تاحال یہ واضح نہیں ہو سکا کہ ہیلی کاپٹر ایرانی فائرنگ کا نشانہ بنا، کسی فنی خرابی کا شکار ہوا یا حادثے کی کوئی اور وجہ تھی۔

نیویارک کے جان ایف کینیڈی انٹرنیشنل ایئرپورٹ پر صحافیوں سے گفتگو کرتے ہوئے صدر ٹرمپ نے کہا کہ دونوں پائلٹ خیریت سے ہیں اور واقعے کی مکمل رپورٹ بعد میں جاری کی جائے گی۔

دوسری جانب ایران اور اسرائیل نے پیر کو ایک دوسرے کے خلاف حملے روکنے کی تصدیق کی ہے۔ یہ پیش رفت صدر ٹرمپ کی اپیل کے بعد سامنے آئی، جس کے نتیجے میں اپریل میں طے پانے والی جنگ بندی کو برقرار رکھنے کی کوشش کی جا رہی ہے۔

تاہم تہران نے خبردار کیا ہے کہ اگر اسرائیل لبنان میں اس کے اتحادی گروپ حزب اللہ کے خلاف کارروائیاں جاری رکھتا ہے تو ایران دوبارہ جوابی اقدامات کر سکتا ہے۔ منگل کو اسرائیلی فوج نے لبنان کے شہر صور (ٹائر) کے بعض علاقوں کے لیے انخلا کا حکم بھی جاری کیا۔

امریکی اور اسرائیلی حکام کے مطابق صدر ٹرمپ اور اسرائیلی وزیراعظم کے درمیان پیر کو ٹیلی فونک رابطہ ہوا۔ ایک انٹرویو میں ٹرمپ نے بتایا کہ انہوں نے نیتن یاہو کو ایران کے خلاف دوبارہ جنگ شروع نہ کرنے کی تنبیہ کی۔

ادھر ایران نے واضح کیا ہے کہ امریکا کے ساتھ کسی بھی ممکنہ امن معاہدے کے لیے پابندیوں کے خاتمے، منجمد اثاثوں کی واپسی اور آبنائے ہرمز پر اپنے کنٹرول کو تسلیم کیے جانے جیسے مطالبات اہم ہیں، جبکہ واشنگٹن کا اصرار ہے کہ ایران جوہری ہتھیار حاصل نہ کر سکے۔