اسرائیلی حملوں میں چھ فلسطینی شہید، غزہ میں کنٹرول زون مزید وسیع

غزہ کی پٹی میں اسرائیلی حملوں میں کم از کم چھ فلسطینی شہید ہو گئے، جن میں ایک بچہ بھی شامل ہے، جبکہ مقامی حکام کے مطابق اسرائیلی فوج نے اپنے کنٹرول والے علاقوں کو مزید وسیع کر دیا ہے۔

طبی حکام کے مطابق جنوبی علاقے خان یونس کے المواسی میں خیمہ بستی کے قریب اسرائیلی حملے میں دو افراد مارے گئے۔ شمالی غزہ کے جبالیا پناہ گزین کیمپ میں ایک اور حملے میں تین فلسطینی، جن میں ایک 8 سالہ بچہ بھی شامل تھا، شہید ہوئے، جبکہ متعدد افراد زخمی ہوئے۔ وسطی غزہ کے دیر البلح میں الاقصیٰ اسپتال کے قریب فضائی حملے میں ایک شخص شہید اور تین زخمی ہوئے، جس کے بعد پیر کے روز مجموعی شہادتیں چھ ہو گئیں۔

اسرائیلی فوج نے ان حملوں پر فوری طور پر کوئی تبصرہ نہیں کیا۔ مقامی رہائشیوں کے مطابق اسرائیلی افواج نے ییلو زون کے نام سے جانے جانے والے اپنے کنٹرول والے علاقے کو مزید آگے بڑھا دیا ہے۔

دوسری جانب قاہرہ میں ثالث غزہ میں امریکا کی سرپرستی میں ہونے والی فائر بندی کو برقرار رکھنے اور اس کے باقی مسائل حل کرنے کے لیے کوششیں جاری رکھے ہوئے ہیں۔

حکام کے مطابق جنگ بندی کے بعد سے اب تک اسرائیلی حملوں میں 950 سے زائد فلسطینی شہید ہو چکے ہیں، جبکہ اسرائیل نے بھی اپنے چار فوجیوں کی ہلاکت کا دعویٰ کیا ہے۔