بھارتی عملے کے آئل ٹینکر میں آتشزدگی، تمام 24 ملاحوں کو باحفاظت بچا لیا گیا

بھارت کی وزارت شپنگ نے بتایا ہے کہ عمان کے ساحل کے قریب ایک آئل ٹینکر میریویکس میں آگ لگنے کا واقعہ پیش آیا ہے، جس پر 24 بھارتی ملاح سوار تھے، تاہم وہ تمام باحفاظت اور محفوظ ہیں۔

وفاقی وزارتِ بندرگاہ و جہاز رانی (پورٹ اینڈ شپنگ) کے ڈائریکٹر اوپیش کمار شرما نے ایک پریس کانفرنس کے دوران بتایا کہ مڈغاسکر کے جھنڈے والا یہ بحری جہاز فی الحال کسی قسم کے تجارتی کارگو (مال) کے بغیر سفر کر رہا تھا۔

اوپیش کمار شرما کا کہنا تھا کہ تمام بھارتی ملاح اس وقت مکمل طور پر محفوظ ہیں۔ ہم ان کی حفاظت کو یقینی بنانے کے لیے وزارتِ خارجہ، بیرونِ ملک قائم اپنے بھارتی مشنز (سفارت خانوں)، بھارتی بحریہ اور وزارتِ دفاع کے ساتھ مسلسل رابطہ کاری کر رہے ہیں۔

انہوں نے مزید بتایا کہ مقامی وقت کے مطابق دوپہر 1:30 بجے بحری جہاز کو پیش آنے والے اس آتشزدگی کے واقعے کی فوری وجہ فی الحال معلوم نہیں ہوسکی ہے۔