خلیج میں کشیدگی سے ڈالر مضبوط، جاپانی ین160 کی سطح تک گرگیا

عالمی کرنسی مارکیٹ میں جاپانی ین جمعہ کو ایک بار پھر ڈالر کے مقابلے میں 160 کی اہم سطح کو چھو گیا، جس کے بعد جاپانی حکام نے سخت ردعمل کا اشارہ دیا ہے۔ دوسری جانب مشرقِ وسطیٰ میں بڑھتی ہوئی کشیدگی کے باعث محفوظ سرمایہ کاری (سیف ہیون) کی طلب بڑھنے سے امریکی ڈالر ہفتہ وار بنیادوں پر مضبوطی کی جانب گامزن ہے۔

ابتدائی ٹریڈنگ کے دوران ین مسلسل تیسرے روز 160 ین فی ڈالر کی سطح تک پہنچ گیا، حالانکہ جاپانی حکام کی جانب سے زبانی انتباہات جاری کیے جا چکے ہیں۔ مالیاتی منڈیوں میں اس سطح کو ممکنہ سرکاری مداخلت کی حد تصور کیا جاتا ہے۔

جاپان کی وزیر خزانہ ساتسوکی کاتایاما نے کہا ہے کہ حکومت زرمبادلہ کی منڈی میں ضرورت پڑنے پر کسی بھی وقت مناسب اور فیصلہ کن کارروائی کرنے کا حق محفوظ رکھتی ہے تاکہ غیر معمولی اتار چڑھاؤ کو روکا جا سکے۔

ادھر تجزیہ کاروں کا کہنا ہے کہ بلند توانائی قیمتیں، امریکی معیشت کے مضبوط اعداد و شمار اور زیادہ شرح سود ڈالر کو سہارا دے رہے ہیں، جس کی وجہ سے ین پر دباؤ برقرار ہے۔

مشرقِ وسطیٰ میں ایران، اسرائیل اور لبنان سے متعلق کشیدگی نے بھی ڈالر کی مانگ میں اضافہ کیا ہے۔ ایران کی حمایت یافتہ حزب اللہ نے لبنان میں نئی جنگ بندی کی تجویز مسترد کر دی ہے جبکہ اسرائیل نے اپنی افواج واپس بلانے سے انکار کیا ہے، جس سے خطے میں غیر یقینی صورتحال مزید بڑھ گئی ہے۔

ادھر سرمایہ کار امریکی نان فارم پے رولز رپورٹ کے منتظر ہیں، جس سے فیڈرل ریزرو کی آئندہ شرح سود پالیسی کے بارے میں اہم اشارے ملنے کی توقع ہے۔