مہنگائی میں اضافے کے خدشات مضبوط، عالمی منڈی میں سونا سستا ہوگیا

عالمی منڈی میں بدھ کے روز سونے کی قیمتوں میں کمی دیکھی گئی، کیونکہ مشرقِ وسطیٰ میں دوبارہ بڑھتی ہوئی کشیدگی کے باعث خام تیل مہنگا ہو گیا، جس سے مہنگائی میں اضافے اور شرح سود طویل عرصے تک بلند رہنے کے خدشات مزید مضبوط ہو گئے۔

اسپاٹ گولڈ کی قیمت 0.2 فیصد کمی کے ساتھ 4,476.50 ڈالر فی اونس رہ گئی، جبکہ اگست کے لیے امریکی گولڈ فیوچر 0.3 فیصد گر کر 4,504.40 ڈالر فی اونس پر آ گئے۔

مشرقِ وسطیٰ میں کشیدگی اس وقت دوبارہ شدت اختیار کر گئی جب امریکی فوج نے بتایا کہ ایران کی جانب سے بحرین، کویت اور دیگر علاقائی اہداف پر داغے گئے میزائل یا تو ناکام رہے یا انہیں روک لیا گیا۔ دوسری جانب واشنگٹن اور تہران کے درمیان سفارتی کوششوں میں بھی کوئی نمایاں پیش رفت سامنے نہیں آ سکی۔

امریکی وزیر خارجہ مارکو روبیو نے کہا کہ صدر ڈونلڈ ٹرمپ کی مذاکراتی ٹیم نے آبنائے ہرمز کھولنے کے بدلے ایران کو پابندیوں میں نرمی کی کوئی پیشکش نہیں کی۔ ان کے مطابق کسی بھی قسم کی پابندیوں میں نرمی ایران کے جوہری پروگرام سے دستبرداری سے مشروط ہوگی۔

ادھر خام تیل کی قیمتوں میں ایک فیصد سے زائد اضافہ ریکارڈ کیا گیا، جس سے مہنگائی کے دباؤ اور شرح سود میں مزید اضافے کے خدشات بڑھ گئے ہیں۔ کلیولینڈ فیڈرل ریزرو کی صدر بیتھ ہیماک نے بھی عندیہ دیا کہ اگر مہنگائی کا دباؤ برقرار رہا تو امریکی مرکزی بینک کو جلد شرح سود بڑھانا پڑ سکتی ہے۔

سرمایہ کار اب امریکی نان فارم پے رولز اور روزگار کے اعداد و شمار کے منتظر ہیں، جن سے فیڈرل ریزرو کی آئندہ مانیٹری پالیسی کے بارے میں اشارے مل سکتے ہیں۔

دیگر قیمتی دھاتوں میں اسپاٹ چاندی 0.5 فیصد کمی کے ساتھ 74.73 ڈالر فی اونس، پلاٹینم 0.2 فیصد کمی کے ساتھ 1,932.25 ڈالر جبکہ پیلیڈیم 0.3 فیصد گر کر 1,365.25 ڈالر فی اونس پر آ گیا۔