لبنان میں اسرائیلی فوج کی موجودگی کا کوئی جواز نہیں، فرانس

فرانس کے وزیر خارجہ نے منگل کے روز کہا ہے کہ لبنان کے اندر گہرائی تک اسرائیلی فوج کی موجودگی کا کوئی جواز پیش نہیں کیا جا سکتا۔ یہ بیان ایسے وقت میں سامنے آیا ہے جب اسرائیل کی جانب سے لبنانی سرحد کے اندر گزشتہ دو دہائیوں میں سب سے گہری پیش قدمی رپورٹ کی گئی ہے۔

فرانسیسی وزیر خارجہ ژاں نوئل بارو نے فرانس ٹی وی سے گفتگو کرتے ہوئے کہا کہ لبنان کے اندر طویل فوجی کارروائیاں اور اسرائیلی قبضے کا تسلسل کسی صورت قابل قبول نہیں ہے۔

یہ پیش رفت اس وقت ہوئی جب اسرائیل اور ایران کی حمایت یافتہ لبنانی تنظیم حزب اللہ کے درمیان رات بھر جھڑپیں جاری رہیں، اگرچہ امریکی صدر ڈونلڈ ٹرمپ نے اعلان کیا تھا کہ دونوں فریقین نے امریکا کی میزبانی میں ہونے والے مذاکرات سے قبل جنگ بندی پر اتفاق کر لیا ہے۔

رپورٹس کے مطابق اتوار کے روز اسرائیلی فوج نے بیوفورٹ قلعہ پر قبضہ کیا، جو جنوبی لبنان کے وسیع علاقے پر نظر رکھتا ہے۔ یہ قلعہ ماضی میں بھی اسرائیلی افواج کے زیر استعمال رہا ہے۔

ایران نے کہا ہے کہ لبنان میں جنگ بندی کسی بھی امریکا کے ساتھ ممکنہ معاہدے کے لیے بنیادی شرط ہے۔