معاہدہ نہ ہونے پر ایران پر دوبارہ حملوں کے لیے تیار ہیں، امریکی وزیرِ دفاع

امریکی وزیر دفاع پیٹ ہیگسیتھ نے ہفتے کو کہا ہے کہ اگر ایران کے ساتھ کوئی معاہدہ طے نہ پایا تو امریکا دوبارہ حملے شروع کرنے کیلئے تیار ہے جب کہ دوسری جانب واشنگٹن اور تہران کے مذاکرات کار معاہدے کی راہ میں حائل بڑے اختلافات دور کرنے کی کوششوں میں مصروف ہیں۔

سنگاپور میں پیٹ ہیگسیتھ نے کہا کہ ضرورت پڑنے پر دوبارہ کارروائی شروع کرنے کی ہماری صلاحیت موجود ہے، ہم اس سے کہیں زیادہ مکمل طور پر تیار ہیں۔

انہوں نے مزید کہا کہ ہمارے ذخائر وہاں اور دنیا بھر میں اس مقصد کیلئے مکمل طور پر موزوں ہیں، اس لیے ہم ایک مضبوط پوزیشن میں ہیں۔

سنگاپور میں شنگریلا ڈائیلاگ سے خطاب کرتے ہوئے پیٹ ہیگسیتھ نے کہا کہ امریکا نے ایشیا پیسیفک خطے سے اپنا رخ نہیں موڑا، اگرچہ وہ ایران کے ساتھ تنازع میں بھی مصروف ہے۔

انہوں نے کہا کہ ہم ایک وقت میں دو کام کرسکتے ہیں۔ ہم اپنے دفاعی صنعتی نظام کو تیزی سے مضبوط کر رہے ہیں تاکہ بہت جلد 2 گنا، 3 گنا اور 4 گنا زیادہ اسلحہ تیار کیا جا سکے، تاکہ دنیا بھر میں ہماری تمام (آپریشنل) منصوبہ بندیوں کیلئے مناسب فنڈنگ اور سپورٹ یقینی بنائی جا سکے۔

پینٹاگون کے سربراہ نے کہا کہ صدر ڈونلڈ ٹرمپ صبر سے کام لینے والے ہیں اور وہ ایک ایسا بڑا معاہدہ چاہتے ہیں جو اس بات کو یقینی بنائے کہ ایران جوہری ہتھیار حاصل نہ کر سکے۔