پاکستان ڈیجیٹل معیشت کا علاقائی مرکز بننے کے لیے تیار ہے، نائب وزیراعظم

نائب وزیراعظم اور وزیر خارجہ محمد اسحاق ڈار نے کہا ہے کہ پاکستان ڈیجیٹل جدت طرازی کے علاقائی مرکز کے طور پر ابھرنے کے لیے بہترین پوزیشن میں ہے۔وزارت خارجہ کے مطابق انہوں نے ملک کے ترقی کرتے ہوئے آئی ٹی سیکٹر، نوجوان ٹیلنٹ اور پاک چین اقتصادی راہداری کے دوسرے مرحلے سی پیک 2.0 کے تحت بڑھتے ہوئے مواقعوں کو نمایاں کیا۔

اسلام آباد میں آئی بی آئی پاکستان ڈیجیٹل اکانومی ہیڈ کوارٹرز کی افتتاحی تقریب سے خطاب کرتے ہوئے اسحاق ڈار نے کہا کہ وزیراعظم شہباز شریف پاکستان کو ڈیجیٹل معیشت اور جدت طرازی کے علاقائی مرکز میں تبدیل کرنے کا وژن رکھتے ہیں۔

انہوں نے مزید کہا کہ پاکستان کی ڈیجیٹل معیشت تیزی سے پھیل رہی ہے اور سرمایہ کاری، ٹیکنالوجی کی شراکت داری اور جدت پر مبنی ترقی کے لیے بے پناہ مواقع پیش کر رہی ہے۔

نائب وزیراعظم کا کہنا تھا کہ سی پیک 2.0 مادی بنیادی ڈھانچے کی ترقی سے ذہین بنیادی ڈھانچے، ڈیجیٹل رابطوں، مصنوعی ذہانت (اے آئی)، انفارمیشن اینڈ کمیونیکیشن ٹیکنالوجی (آئی سی ٹی) اور اختراعی ماحولیاتی نظام کی طرف منتقلی کی علامت ہے۔

پاک چین تعلقات پر روشنی ڈالتے ہوئے اسحاق ڈار نے پاک چین ہمہ موسمی اسٹریٹیجک تعاون پر مبنی شراکت داری کی مضبوطی کا اعادہ کیا اور اسے ایک وقت کی آزمودہ اور قابل اعتماد دوستی قرار دیا جو اب ڈیجیٹل اور اقتصادی تعاون کے نئے مرحلے میں داخل ہو رہی ہے۔

انہوں نے کہا کہ آئی بی آئی پاکستان ڈیجیٹل اکانومی ہیڈ کوارٹرز کا قیام پاک چین دوستی میں ایک اور سنگ میل ہے اور یہ ٹیکنالوجی، سرمایہ کاری اور ڈیجیٹل تبدیلی کے پلیٹ فارم کے طور پر پاکستان کے مستقبل پر بڑھتے ہوئے بین الاقوامی اعتماد کی عکاسی کرتا ہے۔

اسحاق ڈار نے پائیدار معاشی ترقی اور علاقائی رابطوں کے فروغ کے لیے ابھرتی ہوئی ٹیکنالوجیز اور ڈیجیٹل جدت طرازی میں تعاون کو مضبوط بنانے کی اہمیت پر بھی زور دیا۔