پریذیڈنٹ ٹرافی گریڈ ٹو کا آج سے آغاز

پاکستان کرکٹ بورڈ (پی سی بی) نے پریذیڈنٹ ٹرافی گریڈ ٹو گولڈ کے شیڈول کا اعلان کر دیا ہے، جس کا آغاز آج سے ایبٹ آباد، ہری پور، اسلام آباد اور راولپنڈی میں ہو رہا ہے۔

پہلی باراس ٹورنامنٹ کو گولڈ اور سلور ٹیرز میں تقسیم کیا گیا ہے۔ گولڈ ٹیر میں 14 ٹیمیں شامل ہیں، جبکہ 10 ٹیموں پر مشتمل سلور ٹیر کا آغاز پیر سے ہوگا۔ گولڈ ٹیر کی فاتح ٹیم فرسٹ کلاس گریڈ ون اور لسٹ اے ٹورنامنٹس کے لیے کوالیفائی کرے گی۔

گولڈ ٹیر کی فاتح ٹیم کو 50 لاکھ اور رنر اپ کو 25 لاکھ روپے بطور انعام دیے جائیں گے۔ ٹورنامنٹ میں شریک 14 ٹیموں کو دو پولز (اے اور بی ) میں تقسیم کیا گیا ہے۔ پول اے کے میچز ہری پور، ایبٹ آباد اور اسلام آباد، جبکہ پول بی کے میچز راولپنڈی اور اسلام آباد میں کھیلے جائیں گے۔ ہر ٹیم چھ تین روزہ میچز کھیلے گی، جس کے بعد ٹاپ دو ٹیمیں سیمی فائنلز (14 تا 16 جون) کے لیے کوالیفائی کریں گی۔ ٹورنامنٹ کا فائنل 18 سے 21 جون تک کھیلا جائے گا۔