ملکی آئی ٹی برآمدات 4.6 ارب ڈالر تک پہنچ سکتی ہیں، وزیراعظم کو بریفنگ

وزیراعظم شہباز شریف کو آگاہ کیا گیا کہ رواں مالی سال کے دوران پاکستان کی آئی ٹی برآمدات 4.5 سے 4.6 ارب ڈالر تک پہنچنے کی توقع ہے۔

یہ تفصیلات وزیراعظم کی زیرِ صدارت وزارت انفارمیشن ٹیکنالوجی اور ٹیلی کام کے امور سے متعلق ایک جائزہ اجلاس کے دوران سامنے آئیں۔

اجلاس کو ملک میں آئی ٹی کے فروغ کے لیے کیے گئے اقدامات پر بریفنگ دی گئی اور بتایا گیا کہ ملک بھر میں گھریلو انٹرنیٹ کنکشنز کی تعداد 2024 کے 19 لاکھ سے بڑھ کر 2026 میں 51 لاکھ (5.10 ملین) ہو گئی ہے۔

وزیراعظم نے کہا کہ ملک میں آئی ٹی سیکٹر کا فروغ اور اس سے وابستہ برآمدات میں اضافہ حکومت کی اولین ترجیحات میں شامل ہے۔ انہوں نے مزید کہا کہ پاکستان کے نوجوانوں میں آئی ٹی کے حوالے سے بے پناہ ٹیلنٹ موجود ہے جس سے بھرپور فائدہ اٹھایا جانا چاہیے۔

مزید برآں بریفنگ میں بتایا گیا کہ حال ہی میں پاکستان میں فائیو جی سروسز کی نیلامی کی گئی، جو 2016 کے بعد اس حوالے سے دنیا کی سب سے بڑی نیلامی تھی اور اس سے پاکستان کے لیے 50 کروڑ 90 لاکھ (509 ملین) امریکی ڈالر کا ریونیو حاصل ہوا۔

اعلامیے کے مطابق آرٹیفیشل انٹیلی جنس (مصنوعی ذہانت) کے فروغ کے سلسلے میں فروری 2025 میں انڈس اے آئی ویک کا انعقاد کیا گیا جس کے تحت 30 شہروں میں تقریبات منعقد ہوئیں۔ انڈس اے آئی ویک میں 100 سے زائد بین الاقوامی مندوبین نے شرکت کی اور 88 پویلین لگائے گئے۔ اس کے علاوہ اسلام آباد میں سرکاری اسکولوں اور ہیلتھ یونٹس کو فائبر کنیکٹیویٹی فراہم کر دی گئی ہے۔

اجلاس کو یہ بھی بتایا گیا کہ اسلام آباد میں مفت انٹرنیٹ ہاٹ اسپاٹس کی فراہمی کا منصوبہ آخری مراحل میں ہے۔ بریفنگ میں مزید بتایا گیا کہ سید پور ماڈل ویلج اور فاطمہ جناح پارک میں ای لرننگ پوڈزنصب کیے جا رہے ہیں۔