پارما کو شکست دے کر انٹر میلان اطالوی فٹ بال لیگ کا چیمپئن بن گیا، شہر میں جشن کا سماں

انٹر میلان کی جانب سے پارما کے خلاف 0-2 کی فتح کے ساتھ ہی سیری اے کا ٹائٹل اپنے نام کرنے پر پورے میلان میں جشن کا سماں پیدا ہو گیا اور ہزاروں کی تعداد میں حامی سڑکوں پر نکل آئے۔

قریبی سان سیرو اسٹیڈیم میں میچ کے اختتام کی آخری سیٹی بجتے ہی پیازا ڈیل ڈومو کا تاریخی چوک نیلے اور سیاہ لباس میں ملبوس مداحوں سے بھر گیا، جبکہ فلیئرز اور آتش بازی نے رات کے آسمان کو روشن کر دیا۔

یہ پُرجوش ماحول گزشتہ سال کے بالکل برعکس تھا، جب مداحوں کو دوہرے صدمے کا سامنا کرنا پڑا تھا، ایک طرف آخری دن نیپولی کے ہاتھوں لیگ ٹائٹل سے محرومی اور دوسری طرف چیمپئنز لیگ کے فائنل میں پیرس سینٹ جرمین کے ہاتھوں 0-5 کی عبرتناک شکست۔

انٹر میلان کے ایک مداح فیبیو نے جذبات پر قابو پاتے ہوئے کہا کہ میرے پاس الفاظ نہیں ہیں، ان تمام لوگوں کے باوجود جنہوں نے شروع سے آخر تک ہمیں بددعا دی، جیت انٹر کی ہی ہوئی۔ یہ شاندار ہے اور پچھلے سال کے اختتام کے مقابلے میں اس سال ہم ہر خوشی کے حقدار ہیں۔

جشن کے دوران بہت سے مداحوں کی آنکھوں میں خوشی کے آنسو دیکھے گئے۔ ایک اور مداح فیڈریکو کا کہنا تھا کہ ہم اس جیت کے مکمل حقدار تھے۔ سیزن کے آغاز میں لیگ کافی مشکل تھی اور مقابلہ برابر کا تھا لیکن آخر میں سب نے دیکھ لیا کہ کس کے پاس بہترین ٹیم تھی، کس میں ہمت تھی اور کس نے سب سے زیادہ گول کیے۔ دوسرے کلبوں کے مقابلے میں ہمارا گول ڈفرنس تقریباً دوگنا تھا، حقیقت میں کوئی مقابلہ تھا ہی نہیں۔

توقع ہے کہ یہ جشن 13 مئی کو ہونے والے ’کوپا اٹالیا‘ کے فائنل تک جاری رہے گا، جہاں لازیو کی ٹیم انٹر میلان کے ’ڈومیسٹک ڈبل‘ (ایک ہی سیزن میں دو بڑے ٹائٹل) کی راہ میں حائل ہے۔