فیڈ کے بیان کا انتظار، سونے کی قیمت میں معمولی اضافہ

عالمی منڈی میں سونے کی قیمتیں بدھ کے روز زیادہ تر مستحکم رہیں، کیونکہ سرمایہ کار امریکی فیڈرل ریزرو کے چیئرمین جیروم پاول کے آئندہ بیان کے منتظر ہیں تاکہ ایران جنگ کے عالمی معیشت پر ممکنہ اثرات کا اندازہ لگایا جا سکے۔ اس وقت ایران تنازع کے خاتمے کی کوششیں تعطل کا شکار ہیں، جس سے غیر یقینی صورتحال برقرار ہے۔

اسپاٹ گولڈ کی قیمت معمولی 0.1 فیصد اضافے کے ساتھ 4,598.45 ڈالر فی اونس رہی، جبکہ امریکی گولڈ فیوچرز بھی 0.1 فیصد بڑھ کر 4,612.10 ڈالر فی اونس ہو گئے۔ گزشتہ سیشن میں سونا 2 اپریل کے بعد کم ترین سطح تک گر گیا تھا، جس کے بعد معمولی بحالی دیکھی گئی۔

ادھر امریکی صدر ڈونلڈ ٹرمپ نے ایران کی جانب سے پیش کی گئی تازہ تجاویز پر عدم اطمینان کا اظہار کیا ہے، جس سے امن مذاکرات میں پیش رفت رک گئی ہے۔ سرمایہ کاروں کی بڑی توجہ اب فیڈرل ریزرو کے پالیسی فیصلے پر ہے، جہاں توقع کی جا رہی ہے کہ شرح سود برقرار رکھی جائے گی۔

اس ہفتے دیگر مرکزی بینکوں، بشمول یورپی مرکزی بینک، بینک آف انگلینڈ اور بینک آف کینیڈا کے فیصلے بھی مارکیٹ کے لیے اہم ہوں گے۔ دوسری جانب چین، جو دنیا کا سب سے بڑا سونے کا صارف ہے، نے مارچ میں ہانگ کانگ سے سونے کی درآمدات میں اضافہ کیا۔

علاوہ ازیں عالمی بینک نے خبردار کیا ہے کہ اگر مشرقِ وسطیٰ میں جنگ کے اثرات برقرار رہے تو 2026 میں توانائی کی قیمتیں نمایاں طور پر بڑھ سکتی ہیں، جو عالمی منڈیوں پر دباؤ ڈالیں گی۔

اسپاٹ سلور 0.1 فیصد بڑھ کر 73.12 ڈالر فی اونس، پلاٹینم 0.1 فیصد اضافے کے ساتھ 1,942.60 ڈالر جبکہ پیلیڈیم 0.1 فیصد کمی کے ساتھ 1,459.14 ڈالر پر بند ہوا۔