وائٹ ہاؤس عشائیے فائرنگ کیس کا مشتبہ شخص کول ٹامس ایلن کون ہیں؟

وائٹ ہاؤس کورسپانڈنٹس ڈنر فائرنگ کیس میں گرفتار مشتبہ شخص کی شناخت قانون نافذ کرنے والے ایک اہلکار نے کول ٹامس ایلن کے نام سے کی ہے، جو لاس اینجلس کے علاقے کا رہائشی بتایا جاتا ہے۔ اطلاعات کے مطابق وہ تقریباً 31 سال کا ہے اور ٹورینس، کیلیفورنیا میں رہائش رکھتا ہے، جو لاس اینجلس کے قریب ساحلی علاقہ ہے۔

حکام کے مطابق کول ٹامس ایلن نے کیلیفورنیا انسٹیٹیوٹ آف ٹیکنالوجی سے 2017 میں مکینیکل انجینئرنگ میں بیچلرز کی ڈگری حاصل کی، جبکہ 2025 میں کیلیفورنیا اسٹیٹ یونیورسٹی ڈومنگیز ہلز سے کمپیوٹر سائنس میں ماسٹرز مکمل کیا۔ ایک لنکڈ اِن پروفائل کے مطابق وہ خود کو مکینیکل انجینئر، کمپیوٹر سائنس دان، گیم ڈویلپر اور ٹیچر کے طور پر بیان کرتا ہے۔

سوشل میڈیا پوسٹس کے مطابق اسے دسمبر 2024 میں ٹورینس میں قائم سی ٹو ایجوکیشن ادارے کی جانب سے ٹیچر آف دی منتھ بھی قرار دیا گیا تھا، جہاں وہ پارٹ ٹائم تدریسی خدمات انجام دیتا تھا۔ اس کے علاوہ وہ بطور آزاد گیم ڈویلپر بھی کام کرتا رہا ہے۔

رپورٹس کے مطابق مشتبہ شخص اس وقت واشنگٹن ہلٹن ہوٹل کا مہمان تھا، جہاں وائٹ ہاؤس کورسپانڈنٹس ایسوسی ایشن کا سالانہ عشائیہ جاری تھا۔ تاہم حکام نے واضح کیا ہے کہ ابھی تک حملے کا کوئی واضح محرک سامنے نہیں آیا۔

سیکیورٹی حکام کے مطابق ملزم نے شاٹ گن کے ساتھ ایک سیکیورٹی اہلکار پر فائرنگ کی، جس کے بعد اسے موقع پر ہی گرفتار کر لیا گیا۔ واقعے کے وقت صدر ڈونلڈ ٹرمپ، خاتونِ اول میلانیا ٹرمپ، نائب صدر جے ڈی وینس اور متعدد کابینہ اراکین بھی تقریب میں موجود تھے۔

تحقیقات جاری ہیں جبکہ حکام نے کہا ہے کہ واقعے کے محرکات کا تعین کرنے کے لیے مزید شواہد اکٹھے کیے جا رہے ہیں۔