ایرانی وزیر خارجہ عباس عراقچی کی قیادت میں وفد امن مذاکرات کے لیے آج رات پاکستان پہنچے گا، سرکاری میڈیا

سرکاری ٹی وی نے حکومتی ذرائع کے حوالے سے رپورٹ کیا ہے کہ ایرانی وزیر خارجہ سید عباس عراقچی ایک مختصر وفد کے ہمراہ جمعہ کی رات گئے پاکستان پہنچیں گے جبکہ اسلام آباد امریکہ اور ایران کے درمیان امن مذاکرات کے ممکنہ دوسرے دور کی تیاریاں کر رہا ہے۔

رپورٹ کے مطابق عباس عراقچی علاقائی تناؤ میں کمی اور واشنگٹن و تہران کے درمیان مذاکرات کی بحالی کے لیے جاری سفارتی کوششوں کے سلسلے میں پاکستان کی ثالثی ٹیم کے ساتھ اہم بات چیت کے لیے اسلام آباد پہنچیں گے۔

حکومتی ذرائع کا کہنا ہے کہ ان مذاکرات کے بعد امریکہ اور ایران کے درمیان اسلام آباد امن مذاکرات کا دوسرا دور متوقع ہے۔ ذرائع نے مزید بتایا کہ مذاکراتی عمل میں سہولت کاری کے لیے امریکہ کی لاجسٹک اور سیکیورٹی ٹیم پہلے ہی اسلام آباد میں موجود ہے۔

یہ پیش رفت نائب وزیر اعظم اور وزیر خارجہ اسحاق ڈار اور عباس عراقچی کے درمیان جمعہ کو ہونے والے ٹیلیفونک رابطے کے بعد سامنے آئی ہے، جس میں دونوں رہنماؤں نے علاقائی صورتحال اور جاری سفارتی کوششوں پر تبادلہ خیال کیا تھا۔

پاکستان دونوں فریقین پر زور دیتا رہا ہے کہ وہ مذاکرات اور سفارت کاری کا راستہ اختیار کریں۔ اسحاق ڈار نے حال ہی میں اس بات پر زور دیا تھا کہ جنگ بندی میں توسیع سے بامقصد مذاکرات کے لیے جگہ ملے گی اور حالات کو مزید بگڑنے سے بچانے میں مدد ملے گی۔

اسلام آباد نے بارہا اس عزم کا اظہار کیا ہے کہ وہ فوجی تصادم کے بجائے سفارتی ذرائع سے تناؤ کو حل کرنے کی پرامن کوششوں کی حمایت جاری رکھے گا۔