بھارت کی پٹاخہ فیکٹری میں آگ لگنے سے 20 افراد ہلاک، پولیس

جنوبی بھارت کی پٹاخہ فیکٹری میں لگی آگ نے کم از کم 20 افراد کی جان لے لی اور چھ دیگر کو زخمی کر دیا، پولیس نے اس واقعے کی تصدیق کی ہے۔

مقامی پولیس چیف این شری ناتھا نے اے ایف پی کو بتایا کہ ریاست تمل ناڈو کے ضلع ورودھونگر میں ایک لائسنس یافتہ فیکٹری میں پیش آنے والے اس حادثے میں 20 افراد کی ہلاکت کی تصدیق ہو چکی ہے۔

انہوں نے مزید کہا کہ امدادی کارکن اب بھی جائے وقوعہ پر کارروائیوں میں مصروف ہیں، جبکہ آگ لگنے کی اصل وجہ تاحال معلوم نہیں ہو سکی ہے۔

بھارت میں صنعتی حادثات اکثر پیش آتے رہتے ہیں، جس کی بڑی وجہ حفاظتی ضوابط پر عمل درآمد کی کمی اور قوانین کا کمزور نفاذ ہے۔

وزیر اعظم نریندر مودی نے سوشل میڈیا پر اپنی ایک پوسٹ میں اس انتہائی تکلیف دہ واقعے میں اپنے پیاروں کو کھونے والوں سے تعزیت کا اظہار کیا۔

تمل ناڈو کے وزیر اعلیٰ ایم کے اسٹالن نے بھی ان ہلاکتوں کو انتہائی افسوسناک قرار دیتے ہوئے سوشل میڈیا پلیٹ فارم ’ایکس‘ پر اپنے گہرے دکھ کا اظہار کیا۔

واضح رہے کہ اسی ہفتے وسطی بھارت کے ایک پاور پلانٹ میں ہونے والے دھماکے میں بھی 20 سے زائد افراد ہلاک ہوئے تھے۔ گزشتہ ماہ مغربی بھارت میں آتش بازی کے سامان کی ایک فیکٹری میں لگنے والی آگ نے 17 افراد کی جان لی تھی۔