وزیراعظم کی سعودی ولی عہد سے ملاقات، ایران امریکا مذاکرات سے آگاہ کیا

وزیراعظم شہبازشریف نے جدہ میں سعودی عرب کے ولی عہد و وزیراعظم محمد بن سلمان بن عبدالعزیز السعود سے ملاقات کی اور پاکستان کی ان امن کوششوں سے متعلق حالیہ پیش رفت پر تبادلہ خیال کیا جن کے نتیجے میں امریکہ اور ایران کے درمیان جنگ بندی ممکن ہوئی اور حال ہی میں اسلام آباد میں دونوں ممالک کے درمیان تاریخی مذاکرات کا دور منعقد ہوا۔

وزیراعظم آفس کی جانب سے جاری کردہ پریس ریلیز کے مطابق ملاقات کے دوران دونوں رہنماؤں نے بدلتی ہوئی علاقائی صورتحال پر تبادلہ خیال کیا، وزیراعظم نے حالیہ علاقائی کشیدگی کے تناظر میں سعودی عرب کے ساتھ مکمل یکجہتی اور تعاون کا اظہار کیا۔

وزیراعظم نے قیمتی جانوں کے ضیاع پر تعزیت کی اور کہا کہ پاکستان اپنے سعودی بھائیوں کے ساتھ شانہ بشانہ کھڑا ہے۔

انہوں نے سعودی عرب کی جانب سے مثالی تحمل کے مظاہرے کو سراہا۔

انہوں نے کہا کہ موجودہ بحران میں ولی عہد کی قیادت مملکت اور اس سے باہر تمام امن پسند لوگوں کے لیے حوصلے اور طاقت کا باعث ہے۔

وزیراعظم نے سعودی ولی عہد کو اسلام آ باد میں ہونے والے حالیہ مذاکرات اور ایران اور امریکہ کے درمیان جنگ بندی پر منتج ہونے والی قیام امن کیلئے پاکستان کی کوششوں کے بارے میں آگاہ کیا۔

علاوہ ازیں ولی عہد نے وزیراعظم محمد شہبازشریف اور فیلڈ مارشل سید عاصم منیر کے تعمیری کردار کی ستائش کی۔

دوطرفہ امور پر تبادلہ خیال کے دوران وزیراعظم نے سعودی ولی عہد کی جانب سے پاکستان کی مسلسل حمایت کی مخلصانہ تعریف کی۔

وزیراعظم نے کہا کہ پاکستان اور سعودی عرب کے درمیان دوطرفہ تذویراتی دفاعی معاہدے کے باعث دونوں ممالک کے درمیان ایک منفرد تعلق قائم ہے۔

دونوں رہنماؤں نے باہمی دلچسپی کے امور پر قریبی تعاون جاری رکھنے کے مشترکہ عزم کا اظہار کیا۔