ایران امن معاہدے کی امید، ڈالر چھ ہفتوں کی کم ترین سطح کے قریب برقرار

امریکی ڈالر جمعرات کے روز بڑی عالمی کرنسیوں کے مقابلے میں مارچ کے اوائل کے بعد اپنی کم ترین سطح کے قریب برقرار رہا، کیونکہ وائٹ ہاؤس کی جانب سے ایران کے ساتھ ممکنہ امن معاہدے پر امید نے عالمی منڈی میں خطرے سے بچنے کے رجحان کو کم کر دیا۔

امریکی صدر ڈونلڈ ٹرمپ نے کہا ہے کہ ایران کے ساتھ جاری جنگ خاتمے کے قریب ہے، جبکہ وائٹ ہاؤس نے عندیہ دیا ہے کہ مذاکرات کا اگلا دور ممکنہ طور پر دوبارہ پاکستان میں ہو سکتا ہے، جو اس تنازع میں ثالثی کا کردار ادا کر رہا ہے۔

ذرائع کے مطابق ایران اس بات پر غور کر رہا ہے کہ اگر معاہدہ طے پا جائے تو آبنائے ہرمز کے عمانی حصے سے بحری جہازوں کی آزادانہ آمدورفت کی اجازت دی جا سکتی ہے، تاکہ دوبارہ کشیدگی سے بچا جا سکے۔

یورو 1.1808 ڈالر اور برطانوی پاؤنڈ 1.3569 ڈالر پر ٹریڈ کرتا رہا، دونوں میں معمولی اضافہ دیکھا گیا اور یہ فروری کے بعد کی بلند ترین سطح کے قریب رہے۔ ڈالر انڈیکس 98.027 پر مستحکم رہا، تاہم یہ مسلسل آٹھ سیشنز سے کمی کے رجحان میں ہے۔

تجزیہ کاروں کے مطابق مارکیٹ اب جنگ کے رسک پریمیم کو کم کر رہی ہے اور سرمایہ کار زیادہ خطرناک اثاثوں کی طرف واپس جا رہے ہیں، جس سے ڈالر پر دباؤ بڑھ سکتا ہے۔

دوسری جانب آسٹریلوی اور نیوزی لینڈ ڈالر میں بھی بہتری دیکھی گئی، جبکہ جاپانی ین معمولی مضبوط ہوا۔ آف شور چینی کرنسی بھی امریکی ڈالر کے مقابلے میں قدرے بہتر رہی، عالمی معاشی اعداد و شمار کے اجرا سے قبل مارکیٹ محتاط رہی۔