حکومت نے ڈیزل 135 روپے اور پیٹرول 12 روپے فی لیٹر سستا کر دیا

وزیراعظم شہباز شریف نے ڈیزل کی قیمت میں 135 روپے فی لیٹر اور پیٹرول میں 12 روپے فی لیٹر کمی کا اعلان کیا ہے۔

اعلان کے بعد ڈیزل کی نئی قیمت 385 روپے فی لیٹر جبکہ پیٹرول کی 366 روپے فی لیٹر مقرر کر دی گئی ہے۔

نئی قیمتوں کا اطلاق آج (ہفتہ) سے ہوگیا ہے

گزشتہ ہفتے حکومت نے ڈیزل کی قیمت میں 184.49 روپے فی لیٹر اور پیٹرول میں 137.24 روپے فی لیٹر اضافہ کیا تھا، جس کے بعد قیمتیں بالترتیب 520.35 روپے اور 458.41 روپے فی لیٹر تک پہنچ گئی تھیں۔

تاہم بعد ازاں وزیراعظم شہباز شریف نے صارفین پر بڑھتے ہوئے مالی بوجھ کو کم کرنے کے لیے پیٹرولیم لیوی میں 80 روپے کی نمایاں کمی کا اعلان کیا، جس کے نتیجے میں پیٹرول کی قیمت 378 روپے فی لیٹر کر دی گئی۔

جمعہ کے روز قوم سے خطاب کرتے ہوئے وزیراعظم نے کہا کہ جنگ میں الجھے دو ممالک، ایران اور امریکا، تنازع کے حل پر آمادہ ہو گئے ہیں اور اس سلسلے میں اسلام آباد میں مذاکرات طے پا گئے ہیں۔

انہوں نے کہا کہ اب دنیا امن کی بات کررہی ہے۔

وزیراعظم نے جنگ بندی اور اسلام آباد میں مذاکرات کی پیشکش قبول کرنے پر ایران اور امریکا کی قیادت کا ایک بار پھر شکریہ ادا کیا۔

انہوں نے واضح کیا کہ ملک بھر میں پہلے سے اعلان کردہ ایندھن سبسڈی پیکجز بغیر کسی تبدیلی کے جاری رہیں گے۔

ان کا کہنا تھا کہ عالمی تیل کی قیمتوں میں کمی نے حکومت کو یہ موقع فراہم کیا ہے کہ اس کا فائدہ عوام تک منتقل کیا جائے۔

ادھر عالمی منڈی میں تیل کی قیمتیں سعودی عرب کی سپلائی میں خدشات اور آبنائے ہرمز سے محدود ترسیل کے باعث 100 ڈالر فی بیرل کے قریب پہنچ گئیں، تاہم کمزور جنگ بندی کے برقرار رہنے کے سبب یہ گزشتہ جون کے بعد سب سے بڑی ہفتہ وار کمی کی جانب بھی گامزن رہیں۔ برینٹ کروڈ فیوچرز 40 سینٹ یا 0.4 فیصد اضافے کے ساتھ 96.32 ڈالر فی بیرل جبکہ ویسٹ ٹیکساس انٹرمیڈیٹ 84 سینٹ یا تقریباً 0.9 فیصد اضافے کے ساتھ 98.71 ڈالر فی بیرل پر ٹریڈ ہوتا رہا۔