ڈالر کے مقابلے روپے کی قدر میں معمولی اضافہ

انٹربینک مارکیٹ میں جمعہ کو بھی ڈالر کے مقابلے روپے کی قدر میں معمولی اضافہ ریکارڈ کیا گیا۔

کاروبار کے اختتام پر ڈالر کے مقابلے میں روپیہ ایک پیسے کی معمولی بہتری سے 279.01 روپے پر بند ہوا۔

یاد رہے کہ جمعرات کو مقامی کرنسی 279.02 روپے پر بند ہوئی تھی۔

مزید برآں جمعہ کو ڈالر جنوری کے بعد اپنی سب سے بڑی ہفتہ وار گراوٹ کی جانب گامزن تھا، کیونکہ خلیج میں جنگ بندی برقرار رہنے اور تیل کی بحری ترسیل دوبارہ شروع ہونے کی امید کے باعث دیگر کرنسیوں کی قدر میں اضافہ ہوا ہے۔

یورو رواں ہفتے اپنی 200 روزہ اوسط ایوریج کو عبور کرتے ہوئے 1.1690 ڈالر پر ٹریڈ کررہا تھا۔

خطرات کے حوالے سے حساس آسٹریلوی اور نیوزی لینڈ ڈالرز امریکی ڈالر کے مقابلے میں تقریباً 3 فیصد ہفتہ وار اضافے کی جانب گامزن ہیں، جس میں آسٹریلوی ڈالر 70 سینٹ سے کچھ اوپر اور نیوزی لینڈ کا ’کیوی‘ ڈالر 0.5847 ڈالر پر ٹریڈ کر رہا ہے۔

پاؤنڈ اسٹرلنگ کی قدر میں بھی رواں ہفتے 1.8 فیصد کا نمایاں اضافہ ہوا ہے اور یہ اپنی 200 روزہ اوسط متحرک سے اوپر 1.3424 ڈالر پر پہنچ گیا ہے۔

عالمی سطح پر جمعہ کو تیل کی قیمتوں میں اضافہ دیکھا گیا، جہاں برینٹ کروڈ کے سودے 58 سینٹ یا 0.60 فیصد اضافے کے ساتھ 96.50 ڈالر فی بیرل پر پہنچ گئے۔

اسی طرح ویسٹ ٹیکساس انٹرمیڈیٹ کے سودے بھی 49 سینٹ یا 0.50 فیصد اضافے کے ساتھ 98.36 ڈالر فی بیرل پر رہے۔

تاہم اس پورے ہفتے کے دوران دونوں کنٹریکٹس کی قیمتوں میں مجموعی طور پر 11 فیصد کمی واقع ہوئی ہے جو جون 2025 کے بعد کی سب سے بڑی ہفتہ وار گراوٹ ہے۔