وزیراعظم شہبازشریف کا جنگ بندی کا خیرمقدم، امریکہ اور ایران کو اسلام آباد مذاکرات کی دعوت

وزیراعظم شہباز شریف نے بدھ کو ایران اور امریکہ کے درمیان اعلان کردہ دو ہفتوں کی جنگ بندی کا خیرمقدم کیا اور اسے ایک دانشمندانہ اقدام قرار دیا۔

وزیراعظم نے ایکس پر اپنی تحریر میں کہا کہ انتہائی عاجزی کے ساتھ مجھے یہ اعلان کرتے ہوئے بے حد خوشی ہورہی ہے کہ امریکا اور اسلامی جمہوریہ ایران نے اپنے اتحادیوں کے ہمراہ، لبنان اور دیگر تمام مقامات سمیت ہر جگہ فوری جنگ بندی پر اتفاق کیا ہے جو کہ فوری طور پر نافذ العمل ہے۔

انہوں نے دونوں ممالک کی قیادت کا تہہ دل سے شکریہ ادا کیا اور ان کے وفود کو جمعہ 10 اپریل 2026 کو اسلام آباد آنے کی دعوت دی تاکہ تمام تنازعات کے حل کے لیے ایک حتمی معاہدے پر مزید مذاکرات کیے جاسکیں۔

انہوں نے لکھا کہ دونوں فریقین نے غیر معمولی دانشمندی اور سمجھ بوجھ کا مظاہرہ کیا اور امن و استحکام کے مقصد کو آگے بڑھانے کے لیے تعمیری طور پر مصروفِ عمل رہے ہیں۔

وزیراعظم نے کہا کہ انہیں امید ہے کہ اسلام آباد مذاکرات پائیدار امن کے حصول میں کامیاب ہوں گے۔ انہوں نے آنے والے دنوں میں مزید خوشخبری شیئر کرنے کی خواہش کا اظہار بھی کیا۔

ان کا یہ بیان ٹرمپ کے اس اعلان کے بعد سامنے آیا جس میں انہوں نے ایران کے ساتھ دو ہفتوں کی جنگ بندی پر آمادگی ظاہر کی تھی۔ ٹرمپ کا کہنا تھا کہ اس معاہدے کا دارومدار ایران کے اس اتفاق پر ہے کہ وہ آبنائے ہرمز سے تیل اور گیس کی سپلائی کی ناکہ بندی روک دے گا جہاں سے عام طور پر دنیا بھر میں تیل کی ترسیل کا تقریباً پانچواں حصہ گزرتا ہے۔

قبل ازیں وزیراعظم شہباز شریف نے صدر ٹرمپ سے درخواست کی تھی کہ وہ خلیجی تیل کی ناکہ بندی ختم کرنے کیلئے ایران کو دی گئی ڈیڈ لائن میں دو ہفتوں کی توسیع کریں۔

وزیراعظم نے ایکس پر ایک پوسٹ میں کہا کہ سفارت کاری کے عمل کو آگے بڑھانے کا موقع دینے کے لیے میں صدر ٹرمپ سے پوری سنجیدگی کے ساتھ درخواست کرتا ہوں کہ وہ ڈیڈ لائن میں دو ہفتوں کی توسیع کریں۔ پاکستان پورے خلوص کے ساتھ ایرانی بھائیوں سے بھی درخواست کرتا ہے کہ وہ خیر سگالی کے طور پر اسی مناسبت سے دو ہفتوں کی مدت کیلئے آبنائے ہرمز کو کھول دیں۔

انہوں نے تمام متحارب فریقین سے بھی مطالبہ کیا کہ وہ ہر جگہ دو ہفتوں کے لیے جنگ بندی کریں تاکہ سفارت کاری کے ذریعے جنگ کا حتمی خاتمہ ممکن ہو سکے۔

انہوں نے مزید کہا کہ جنگ کو پرامن طریقے سے حل کرنے کی سفارتی کوششیں مستحکم اور بھرپور طریقے سے آگے بڑھ رہی ہیں جن میں مستقبل قریب میں ٹھوس نتائج برآمد ہونے کی بھرپور صلاحیت موجود ہے۔

دریں اثنا، امریکی صدر نے اپنی پوسٹ میں کہا کہ یہ دو طرفہ جنگ بندی ہوگی!

انہوں نے مزید کہا کہ اس کی وجہ یہ ہے کہ ہم نے اپنے تمام فوجی مقاصد نہ صرف حاصل کرلیے بلکہ ان سے آگے نکل چکے ہیں اور ہم ایران کے ساتھ طویل مدتی امن اور مشرق وسطیٰ میں امن کے حوالے سے ایک حتمی معاہدے کی جانب بہت آگے بڑھ چکے ہیں۔

ٹرمپ نے بتایا کہ ایران نے ایک 10 نکاتی تجویز پیش کی ہے جو مذاکرات کے لیے ایک قابلِ عمل بنیاد ہے، انہیں توقع ہے کہ دو ہفتوں کی اس جنگ بندی کے دوران معاہدے کو حتمی شکل اور عملی جامہ پہنا دیا جائے گا۔

رائٹرز کے مطابق عراق میں ایران کے حمایت یافتہ مسلح گروہوں کے اتحاد اسلامک ریزسٹنس ان عراق نے بدھ کو جاری کردہ ایک بیان میں کہا کہ وہ عراق اور پورے خطے میں اپنی کارروائیاں دو ہفتوں کے لیے معطل کردے گا۔

ایران کے خلاف جنگ، جس کا آغاز 28 فروری کو ایران پر امریکہ اور اسرائیل کے حملوں سے ہوا تھا، اب تک مشرق وسطیٰ میں ہزاروں افراد کی جانیں لے چکی ہے۔