چین کا فوری جنگ بندی کا مطالبہ، ٹرمپ کا ایران پر حملے جاری رکھنے کا اعلان

چین نے مشرقِ وسطیٰ میں فوری جنگ بندی کا مطالبہ کیا ہے، یہ مطالبہ امریکی صدر ڈونلڈ ٹرمپ کی جانب سے آنے والے ہفتوں میں اسلامی جمہوریہ ایران پر شدید حملوں کی دھمکی کے بعد سامنے آیا ہے۔

بیجنگ کی وزارتِ خارجہ کی ترجمان ماؤ ننگ نے پریس کانفرنس کے دوران کہا کہ فوجی ذرائع سے بنیادی مسائل حل نہیں کیے جا سکتے اور تنازعات میں اضافہ کسی بھی فریق کے مفاد میں نہیں ہے۔ انہوں نے متعلقہ فریقین پر زور دیا کہ وہ فوری طور پر فوجی کارروائیاں بند کریں۔

چین نے یہ بھی کہا ہے کہ ایران پر امریکہ اور اسرائیل کے حملے ہی آبنائے ہرمز کی ناکہ بندی کی بنیادی وجہ ہیں۔ جب ٹرمپ کے اس بیان کے بارے میں پوچھا گیا جس میں انہوں نے متاثرہ ممالک سے اس اہم آبی گزرگاہ کا کنٹرول سنبھالنے کا کہا تھا تو ترجمان ماؤ ننگ کا کہنا تھا کہ آبنائے ہرمز میں جہاز رانی میں مداخلت کی اصل وجہ ایران کے خلاف امریکہ اور اسرائیل کی غیر قانونی فوجی کارروائیاں ہیں۔

امریکی صدر نے بدھ کو کہا تھا کہ جو ممالک آبنائے ہرمز کے ذریعے تیل حاصل کرتے ہیں، انہیں اس گزرگاہ کی حفاظت خود کرنی چاہیے۔ انہوں نے ان ممالک پر زور دیا کہ وہ اس کا کنٹرول سنبھالیں، اس کی حفاظت کریں اور اسے اپنے لیے استعمال کریں۔