ناسا کا نصف صدی بعد چاند کیلئے پہلا انسانی مشن، چار خلا باز روانہ

امریکی خلائی ادارے ناسا نے بدھ کے روز فلوریڈا سے چار خلا بازوں کو آرٹیمس ٹو مشن پر چاند کے گرد 10 روزہ تاریخی سفر کے لیے روانہ کیا، جو امریکہ کی جانب سے انسانوں کو دوبارہ چاند کی سطح پر بھیجنے کی تیاریوں میں اب تک کا سب سے بڑا قدم قرار دیا جا رہا ہے۔

ناسا کا اسپیس لانچ سسٹم (ایس ایل ایس) راکٹ، جس کے اوپر اوریون کریو کیپسول نصب تھا، کینیڈی اسپیس سینٹر سے مقامی وقت کے مطابق شام 6 بج کر 35 منٹ پر روانہ ہوا۔ اس شاندار لانچ کے دوران راکٹ نے بڑے پیمانے پر سفید دھوئیں کے بادل پیدا کیے اور خلا کی جانب بلند پرواز کی۔

اس مشن میں ناسا کے خلا باز ریڈ وائزمین، وکٹر گلوور اور کرسٹینا کوچ کے ساتھ کینیڈین اسپیس ایجنسی کے خلا باز جیریمی ہینسن شامل ہیں۔ یہ عملہ تقریباً 10 دن کے مشن کے دوران چاند کے گرد چکر لگائے گا اور زمین سے انسانی تاریخ کے سب سے دور خلا میں سفر کرے گا۔

لانچ سے قبل کمانڈ سنٹر سے جیریمی ہینسن نے کہا کہ یہ مشن پوری انسانیت کے لیے ہے۔ لانچ ڈائریکٹر نے عملے کو نیک خواہشات اور کامیابی کی دعا دیتے ہوئے اسے ایک تاریخی لمحہ قرار دیا۔

یہ عملہ تقریباً تین سال کی تربیت کے بعد اس مشن پر روانہ ہوا ہے، جو 2017 میں شروع کیے گئے آرٹیمس پروگرام کا پہلا انسانی مشن ہے۔ اس پروگرام کا مقصد اگلی دہائی میں چاند پر مستقل امریکی موجودگی قائم کرنا ہے۔

اوریون کیپسول، جو لاک ہیڈ مارٹن نے ناسا کے لیے تیار کیا ہے، راکٹ سے علیحدگی کے بعد زمین کے مدار میں خود مختار کنٹرول کے تحت مختلف تکنیکی تجربات کرے گا، جن میں اس کی سمت اور رفتار کو جانچنا شامل ہے۔

آرٹیمس ٹو مشن کا مقصد چاند پر انسانی لینڈنگ کی تیاری کو آگے بڑھانا ہے، جس کا ہدف اب 2028 میں آرٹیمس فور مشن کے ذریعے مکمل لینڈنگ ہے۔ یہ امریکہ کی 1972 میں اپالو مشن کے بعد انسانوں کی چاند پر پہلی واپسی ہوگی۔

ناسا اس مشن کے ذریعے چین کے بڑھتے ہوئے خلائی پروگرام کے مقابلے میں اپنی برتری برقرار رکھنے کی کوشش کر رہا ہے، جو 2030 تک چاند پر انسانی مشن کا ہدف رکھتا ہے۔

یہ مشن تقریباً 252 ہزار میل کے فاصلے تک خلا بازوں کو لے جائے گا، جو اب تک انسانی تاریخ کا سب سے طویل خلائی سفر ہوگا۔ اس سے پہلے یہ ریکارڈ اپالو 13 کے پاس تھا، جو تکنیکی خرابی کے باعث چاند پر لینڈ نہیں کر سکا تھا۔

آرٹیمس ٹو اسپیس لانچ سسٹم اور اوریون کیپسول کی عملی صلاحیتوں کا اہم امتحان بھی ہے، جبکہ اس منصوبے پر بوئنگ اور نارتھروپ گرومین نے ایک دہائی سے زائد عرصے سے کام کیا ہے۔ اس پروگرام کو اس کی بلند لاگت کے باعث بھی توجہ حاصل رہی ہے، جو فی لانچ 2 سے 4 ارب ڈالر تک بتائی جاتی ہے۔

اس وقت اسپیس ایکس اور بلیو اوریجن بھی ناسا کے مستقبل کے چاند مشنز کے لیے لینڈرز تیار کر رہے ہیں، جو آئندہ چاند پر انسانی لینڈنگ میں استعمال ہوں گے۔