ضابطہ اخلاق کی خلاف ورزی: فخر زمان پر ایچ بی ایل پی ایس ایل کے دو میچوں کی پابندی

پاکستان کرکٹ بورڈ (پی سی بی) نے فخر زمان کو جاری ایچ بی ایل پاکستان سپر لیگ کے دو میچوں کے لیے معطل کر دیا ہے۔ انہیں حالیہ میچ کے دوران ضابطہ اخلاق کی خلاف ورزی کا مرتکب پایا گیا ہے۔

پی سی بی کے مطابق فخر زمان نے 29 مارچ کو قذافی اسٹیڈیم میں لاہور قلندرز اور کراچی کنگز کے درمیان کھیلے گئے میچ کے دوران آرٹیکل 2.14 کے تحت لیول 3 کی خلاف ورزی کی۔ یہ واقعہ میچ کے آخری لمحات میں اس وقت پیش آیا جب آن فیلڈ امپائرز نے لاہور قلندرز کو پانچ رنز کا جرمانہ کیا اور کراچی کنگز کی اننگز کے آخری اوور سے قبل گیند تبدیل کرنے کا حکم دیا۔

یہ الزامات میچ آفیشلز بشمول آن فیلڈ امپائرز شاہد سیقت اور فیصل خان آفریدی، ٹی وی امپائر آصف یعقوب اور فورتھ امپائر طارق رشید کی جانب سے عائد کیے گئے۔ فخر زمان نے الزامات کی تردید کرتے ہوئے مکمل تادیبی سماعت کا راستہ اختیار کیا۔ میچ ریفری روشن ماہنامہ نے سماعت کی اور شواہد کے جائزے اور کھلاڑی کا دفاع سننے کے بعد چارج برقرار رکھا۔ اس موقع پر لاہور قلندرز کے نمائندے اور کپتان شاہین شاہ آفریدی بھی موجود تھے۔

ضابطہ اخلاق کا آرٹیکل 2.14 بال ٹیمپرنگ یا گیند کی حالت بدلنے سے متعلق ہے، جس میں گیند کی سطح کو رگڑنا، سیون (سلائی) سے چھیڑ چھاڑ یا کوئی بیرونی مادہ لگانا شامل ہے۔ قواعد کے مطابق لیول 3 کی خلاف ورزی پر پہلی بار کم از کم ایک اور زیادہ سے زیادہ دو میچوں کی پابندی عائد کی جا سکتی ہے۔ فخر زمان کو اس سلسلے میں زیادہ سے زیادہ سزا سنائی گئی ہے۔

پابندی کے باعث فخر زمان اب 3 اپریل کو لاہور میں ملتان سلطانز اور 9 اپریل کو کراچی میں اسلام آباد یونائیٹڈ کے خلاف ہونے والے میچوں میں شرکت نہیں کر سکیں گے۔ پی سی بی نے مزید واضح کیا کہ اس فیصلے کے خلاف کسی بھی اپیل کو تحریری فیصلے کی وصولی کے 48 گھنٹوں کے اندر ایچ بی ایل پی ایس ایل کی ٹیکنیکل کمیٹی کے پاس جمع کرانا لازمی ہے۔