پاکستان اور کویت کا تجارت و سرمایہ کاری کے نئے مواقع تلاش کرنے پر اتفاق

پاکستان اور کویت کے درمیان تجارت، سرمایہ کاری اور صنعتی تعاون کو وسعت دینے پر غور کیا جا رہا ہے، جس میں غذائی برآمدات، موبائل فون مینوفیکچرنگ اور لاجسٹکس کے شعبے شامل ہیں۔

بدھ کو جاری سرکاری بیان کے مطابق یہ پیش رفت وزیراعظم کے معاونِ خصوصی برائے صنعت و پیداوار ہارون اختر خان اور پاکستان میں کویت کے سفیر ناصر عبدالرحمان جاسم المطیری کے درمیان ملاقات میں سامنے آئی، جس میں دوطرفہ تعلقات اور تعاون کے نئے مواقع پر تبادلہ خیال کیا گیا۔

اجلاس میں سیکریٹری صنعت و پیداوار کیپٹن (ر) سیف انجم، سیکریٹری تجارت جاوید پال اور نیشنل لاجسٹکس کارپوریشن کے ڈائریکٹر جنرل میجر جنرل فرخ شہزاد راؤ بھی شریک تھے۔

ملاقات کے دوران ہارون اختر خان نے کہا کہ کویت ایک برادر ملک ہے اور پاکستان کے اس کے ساتھ مضبوط اور دیرینہ تعلقات ہیں۔ انہوں نے کہا کہ وزیراعظم شہباز شریف کی قیادت میں پاکستان مشکل جیوپولیٹیکل حالات کے باوجود خطے میں امن کے فروغ کے لیے سرگرم عمل ہے۔

انہوں نے مزید بتایا کہ وزیراعظم نے خلیجی ممالک کو غذائی برآمدات بڑھانے کے لیے خصوصی کمیٹیاں تشکیل دی ہیں اور پاکستان دونوں ممالک کے درمیان بزنس ٹو بزنس روابط اور سرمایہ کاری کے نئے مواقع تلاش کرنے کا خواہاں ہے۔

ہارون اختر خان نے کہا کہ پاکستان کویت کے لیے ایک بڑی منڈی ہے اور قدرتی وسائل اور قدرتی حسن سے مالا مال ہے۔ انہوں نے کویت کے ساتھ تجارت، سرمایہ کاری اور برآمدات کے تعلقات کو مزید مضبوط بنانے کے عزم کا اعادہ کیا۔

کویتی سفیر نے مشکل وقت میں پاکستانی عوام کی جانب سے دی گئی حمایت کو سراہا اور اظہارِ یکجہتی پر شکریہ ادا کیا۔ انہوں نے خوراک، انفارمیشن ٹیکنالوجی اور تجارت سمیت اہم شعبوں میں تعاون بڑھانے میں کویت کی دلچسپی کا اعادہ کیا۔

سیکریٹری صنعت سیف انجم نے موبائل فون مینوفیکچرنگ اور دیگر صنعتی شعبوں میں تعاون کے وسیع امکانات پر روشنی ڈالی، جبکہ ڈی جی این ایل سی میجر جنرل فرخ شہزاد راؤ نے لاجسٹکس، کارگو اور ٹرانسپورٹ کے شعبوں میں تعاون بڑھانے کے مواقع کو اجاگر کیا۔

ملاقات کے اختتام پر دونوں ممالک نے دوطرفہ تعلقات کو مزید مضبوط بنانے اور تعاون کے نئے شعبے تلاش کرنے کے عزم کا اظہار کیا۔