ڈالر کمزور، سونے کی قیمت میں 2 فیصد سے زائد اضافہ

عالمی منڈی میں سونے کی قیمتوں میں بدھ کے روز نمایاں اضافہ دیکھنے میں آیا اور قیمتیں 2 فیصد سے زائد بڑھ گئیں۔ ڈالر کی قدر میں کمی اور تیل کی قیمتوں میں گراوٹ کے باعث افراطِ زر اور عالمی سطح پر شرح سود میں اضافے سے متعلق خدشات کم ہونے کے بعد سرمایہ کاروں کی سونے میں دلچسپی دوبارہ بڑھ گئی۔

اسپاٹ گولڈ کی قیمت 2.5 فیصد اضافے کے بعد 4,587.09 ڈالر فی اونس تک پہنچ گئی، جبکہ اپریل ڈیلیوری کے لیے امریکی گولڈ فیوچر 4.2 فیصد اضافے کے ساتھ 4,586.10 ڈالر فی اونس تک پہنچ گئے۔

ڈالر کی قدر میں کمی کے باعث دیگر کرنسیوں کے حامل سرمایہ کاروں کے لیے ڈالر میں قیمت رکھنے والا سونا نسبتاً سستا ہو گیا، جس سے اس کی طلب میں اضافہ ہوا۔

او سی بی سی بینک کے اسٹریٹجسٹ کرسٹوفر وونگ کے مطابق مشرق وسطیٰ میں کشیدگی کم ہونے کی امید اور امریکی ڈالر میں کمزوری کے بعد سونے کی محفوظ سرمایہ کاری کی حیثیت دوبارہ نمایاں ہو رہی ہے۔ ان کا کہنا تھا کہ سونا اپنی محفوظ سرمایہ کاری کی حیثیت نہیں کھویا تھا بلکہ وقتی طور پر ڈالر کی مضبوطی کے باعث دباؤ کا شکار ہوا تھا۔

انہوں نے کہا کہ قریبی مدت میں سونے کی قیمتیں امریکی فیڈرل ریزرو کی شرح سود کی پالیسی، ڈالر کی قدر اور جغرافیائی سیاسی صورتحال سے متاثر رہیں گی، تاہم حالیہ بحالی سے ظاہر ہوتا ہے کہ قیمتوں میں کمی آنے پر خریدار دوبارہ متحرک ہو سکتے ہیں جب تک حقیقی شرح منافع میں نمایاں اضافہ نہ ہو۔

ادھر عالمی منڈی میں خام تیل کی قیمتیں 100 ڈالر فی بیرل سے نیچے آ گئیں، جس سے افراطِ زر کے خدشات میں کمی آئی ہے۔ تیل کی قیمتوں میں کمی اس امید کے بعد سامنے آئی ہے کہ مشرق وسطیٰ میں ممکنہ جنگ بندی سے سپلائی میں رکاوٹیں کم ہو سکتی ہیں۔

امریکی صدر ڈونلڈ ٹرمپ نے منگل کو کہا تھا کہ امریکہ ایران کے ساتھ جنگ کے خاتمے کے لیے مذاکرات میں پیش رفت کر رہا ہے اور تہران سے ایک اہم رعایت بھی حاصل کی گئی ہے۔ ذرائع کے مطابق واشنگٹن نے ایران کو تنازع کے حل کے لیے 15 نکاتی منصوبہ بھی بھیجا ہے۔

سی ایم ای گروپ کے فیڈ واچ ٹول کے مطابق شرح سود کے فیوچر معاہدے اس بات کا امکان تقریباً ختم کر چکے ہیں کہ رواں سال امریکی فیڈرل ریزرو شرح سود میں کمی کرے گا۔

دیگر قیمتی دھاتوں میں اسپاٹ چاندی کی قیمت 3.6 فیصد اضافے کے ساتھ 73.78 ڈالر فی اونس ہو گئی، جبکہ پلاٹینم 2.2 فیصد بڑھ کر 1,978.10 ڈالر اور پیلیڈیم 1.5 فیصد اضافے کے ساتھ 1,461.56 ڈالر فی اونس تک پہنچ گیا۔