کے الیکٹرک نے سید طحہ کو سی ای او مقرر کر دیا

کراچی کی واحد پاور یوٹیلٹی کے الیکٹرک نے سید طحہٰ کو کمپنی کا نیا چیف ایگزیکٹو آفیسر مقرر کر دیا ہے۔

یہ اطلاع کمپنی نے منگل کو اسٹاک ایکسچینج کو نوٹس میں دی۔ نوٹس کے مطابق، کے الیکٹرک لمیٹڈ کے بورڈ آف ڈائریکٹرز نے سید طحہٰ کو 15 اپریل 2026 سے کمپنی کا نیا چیف ایگزیکٹو آفیسر مقرر کیا ہے، جنہوں نے ادیب احمد کی جگہ لی ہے، جو عبوری طور پر سی ای او تھے۔

کمپنی نے بتایا کہ سید طحہٰ انجینئرنگ کی ڈگری کے حامل ہیں اور انسٹی ٹیوٹ آف بزنس ایڈمنسٹریشن کراچی سے فنانس میں ایم بی اے کر چکے ہیں۔

سید طحہٰ فروری 2020 سے پاکستان اسٹیٹ آئل کمپنی لمیٹڈ کے منیجنگ ڈائریکٹر اور سی ای او کے طور پر خدمات انجام دے رہے تھے۔

اس سے قبل وہ اوئسس انرجی میں ایگزیکٹو ڈائریکٹر کے طور پر کام کر چکے ہیں، جہاں انہوں نے نائجیریا کی پورٹ ہارکورٹ الیکٹرک ڈسٹری بیوشن کمپنی کے پروگرام مینجمنٹ آفس کی قیادت کی۔

انہوں نے پہلے کے الیکٹرک میں چیف ڈسٹری بیوشن آفیسر کے طور پر خدمات انجام دیں اور مختلف اداروں میں سینئر عہدوں پر فائز رہے۔

سید طحہٰ نے شل پاکستان، کیلٹیکس پاکستان (اے شیورون کمپنی) میں بھی کام کیا اور اسٹیل انڈسٹری کا تجربہ بھی رکھتے ہیں۔

سید طحہٰ کی تقرری کے الیکٹرک کی قیادت میں حالیہ تبدیلیوں کے دوران ہوئی ہے، جب مونس علوی نے چیف ایگزیکٹو آفیسر کے عہدے سے استعفیٰ دیا تھا۔

مونس علوی کے فروری میں استعفیٰ کے بعد ادیب احمد کو فوری طور پر کمپنی کا عبوری سی ای او مقرر کیا گیا تھا۔