ایچ بی ایل پی ایس ایل ٹرافی انفینٹی کا ملک گیر سفر مکمل، لاہور پہنچ گئی

ایچ بی ایل پاکستان سپر لیگ کی خوبصورت انفینٹی ٹرافی ملک کے مختلف سیاحتی اور تاریخی مقامات کا یادگار سفر طے کرنے کے بعد لاہور پہنچ گئی ہے۔ حنیف جیولرز کی تیار کردہ یہ شاہکار ٹرافی 18 ماہر کاریگروں کی 2,600 گھنٹوں کی انتھک محنت کا نتیجہ ہے۔

اس ٹرافی کی رونمائی 11 مارچ کو کراچی کے نیشنل بینک اسٹیڈیم میں پی ایس ایل کے چیف ایگزیکٹو سلمان نصیر اور فرنچائز نمائندوں کی موجودگی میں کی گئی تھی۔ اپنے سفر کے دوران ٹرافی کو کراچی میں مزار قائد، ایمپریس مارکیٹ اور سی ویو لے جایا گیا، جس کے بعد اس نے مکلی کے قبرستان، شاہ جہاں مسجد اور حیدرآباد کرکٹ اسٹیڈیم کا رخ کیا۔ اسلام آباد میں فیصل مسجد اور پاکستان مونیومنٹ کے بعد ٹرافی نے اسکردو کی وادیوں، خپلو فورٹ اور کٹپناہ ریگستان کی سیر کی۔ پشاور میں سیٹھی محلہ اور عمران خان کرکٹ اسٹیڈیم کے دورے کے بعد اب یہ لاہور کے قلعہ، مینارِ پاکستان اور بادشاہی مسجد پہنچ چکی ہے۔

ٹرافی کی بنیاد پر 8 قیمتی پتھر تمام فرنچائزز کے رنگوں کی نمائندگی کرتے ہیں، جبکہ مجموعی طور پر 1,600 جواہرات اور چاند ستارے کا ڈیزائن اس کی خوبصورتی کو چار چاند لگاتا ہے۔ پی ایس ایل 11 کا میدان 26 مارچ سے سجے گا۔

کاپی رائٹ بزنس ریکارڈر 2026