چیمپئنز ٹرافی کے فاتح کپتان سرفراز احمد کا انٹرنیشنل کرکٹ سے ریٹائرمنٹ کا اعلان

پاکستان کے سابق کپتان سرفراز احمد، جنہوں نے 2017 میں اپنی قوم کو پہلا چیمپئنز ٹرافی ٹائٹل جتوایا تھا نے اتوار کو انٹرنیشنل کرکٹ سے ریٹائرمنٹ کا اعلان کردیا ہے۔

کراچی میں پیدا ہونے والے وکٹ کیپر بیٹر نے تقریباً دو دہائیوں پر محیط اپنے کیریئر میں 54 ٹیسٹ، 117 ون ڈے اور 61 ٹی ٹوئنٹی انٹرنیشنل میچز میں پاکستان کی نمائندگی کی۔ انہوں نے تمام فارمیٹس میں مجموعی طور پر 6 ہزار سے زائد رنز بنائے جبکہ بطور وکٹ کیپر 315 کیچز پکڑے اور 56 اسٹمپ آؤٹ کیے۔

38 سالہ سرفراز احمد نے 2017 میں پاکستان کو چیمپئنز ٹرافی میں اس وقت تاریخی کامیابی دلوائی جب اوول کے میدان پر کھیلے گئے فائنل میں پاکستان نے بھارت کو 180 رنز کے بڑے مارجن سے شکست دی۔ اس سے قبل انہوں نے 2006 میں انڈر 19 ٹیم کو بھی ورلڈ کپ جتوایا تھا۔

سرفراز احمد نے ایک بیان میں کہا کہ پاکستان کی نمائندگی کرنا میری زندگی کا سب سے بڑا اعزاز رہا ہے۔ 2006 میں انڈر 19 ٹیم کو ورلڈ ٹائٹل جتوانے سے لے کر 2017 میں آئی سی سی چیمپئنز ٹرافی اٹھانے تک گرین شرٹس میں گزارا ہوا ہر لمحہ میرے لیے بہت خاص رہا ہے۔

تمام فارمیٹس میں پاکستان کی کپتانی کرنا کسی خواب کے سچ ہونے جیسا تھا۔ میں نے ہمیشہ نڈر ہو کر کرکٹ کھیلنے اور ایک متحد ٹیم بنانے کی کوشش کی۔

اپنی کپتانی کے دوران بابر اعظم، شاہین آفریدی، حسن علی اور دیگر کھلاڑیوں کو میچ ونر بنتے دیکھنا میری سب سے بڑی کامیابیوں میں سے ایک ہے۔

سرفراز احمد نے تینوں فارمیٹس میں مجموعی طور پر 100 بین الاقوامی میچوں میں پاکستان کی قیادت کی اور اپنی کپتانی میں ٹیم کو ٹی 20 رینکنگ میں پہلی پوزیشن تک بھی پہنچایا۔