وزیراعظم شہباز شریف کو پاک افغان صورتحال پر بریفنگ دی گئی

وزیراعظم شہباز شریف نے جمعہ کو جنرل ہیڈ کوارٹرز (جی ایچ کیو) کا دورہ کیا، جہاں فوجی قیادت کی جانب سے انہیں پاک افغان موجودہ صورتحال پر تفصیلی بریفنگ دی گئی۔

پاکستانی افواج نے جوابی حملوں میں افغان طالبان کی 73 سے زائد چوکیوں اور 115 ٹینکوں کو تباہ کر دیا، جس میں طالبان حکومت کے 274 کارندے اور دہشت گرد ہلاک جبکہ 400 سے زائد زخمی ہوئے ہیں۔ یہ تفصیلات ڈائریکٹر جنرل انٹر سروسز پبلک ریلیشنز (آئی ایس پی آر) لیفٹیننٹ جنرل احمد شریف چوہدری نے دن کے وقت ایک پریس بریفنگ کے دوران فراہم کیں۔ فوجی ترجمان کے مطابق ان جھڑپوں کے دوران پاکستان کے 12 سپاہی شہید اور 27 زخمی ہوئے، جبکہ ایک لاپتہ ہے۔

پاکستان کے سرحدی علاقوں میں دہشت گردانہ تشدد میں اضافے کے باعث حالیہ دنوں میں اسلام آباد اور کابل کے درمیان کشیدگی میں شدید اضافہ ہوا ہے۔ جی ایچ کیو کے دورے کے دوران وزیراعظم نے ہدایت کی کہ فتنہ الخوارج اور افغان طالبان حکومت کے گٹھ جوڑ اور ان کی تخریبی سرگرمیوں کے خلاف زیرو ٹالرنس (عدم برداشت) کی پالیسی اپنائی جائے۔

وزیر اعظم ہاؤس (پی ایم او) سے جاری بیان کے مطابق شہباز شریف نے کہا کہ فیلڈ مارشل سید عاصم منیر، چیف آف آرمی اسٹاف و چیف آف ڈیفنس فورسز کی قیادت میں پاکستان کی مسلح افواج ملک کے دفاع کے لیے ہر وقت مکمل تیار ہیں۔انہوں نے مزید کہا کہ وطنِ عزیز کے دفاع کے لیے پوری قوم اپنی مسلح افواج کے ساتھ کندھے سے کندھا ملا کر کھڑی ہے۔