امریکی ٹریژری ییلڈ میں کمی، مضبوط ڈالر کے باوجود سونے کی قیمت مستحکم

سونے کی قیمتیں جمعہ کے روز مجموعی طور پر مستحکم رہیں کیونکہ امریکی ٹریژری بانڈز کی پیداوار میں کمی سے سونا رکھنے کی موقع لاگت کم ہوئی، جس نے مضبوط ڈالر اور امریکا ایران مذاکرات میں پیش رفت کے اشاروں کے اثرات کو متوازن کر دیا۔

اسپاٹ گولڈ 0301 جی ایم ٹی پر 5,184.69 ڈالر فی اونس پر برقرار رہا۔

سونا مسلسل ساتویں ماہ اضافے کی جانب گامزن ہے اور فروری میں اس کی قیمت میں 6 فیصد سے زائد اضافہ ہوا، کیونکہ امریکی ٹیرف سے متعلق غیر یقینی صورتحال اور امریکا ایران کشیدگی میں اضافے نے اسے محفوظ سرمایہ کاری کے طور پر پرکشش بنا دیا۔

اپریل ڈلیوری کے لیے امریکی گولڈ فیوچرز 0.2 فیصد اضافے کے ساتھ 5,201.40 ڈالر پر پہنچ گئے۔

او اے این ڈی اے کے سینئر مارکیٹ تجزیہ کار کیلوِن وونگ کے مطابق دس سالہ امریکی ٹریژری بانڈ کی افراط زر کے بعد حقیقی پیداوار میں نمایاں کمی آئی ہے، جو اس وقت سونے کے لیے معاون عنصر ہے۔ ان کے بقول امریکا ایران مذاکرات کے بعد خطرے کے پریمیم میں کمی کے باوجود سونا مستحکم رہنے میں کامیاب رہا۔

بینچ مارک دس سالہ پیداوار تین ماہ کی کم ترین سطح پر آ گئی، جبکہ ڈالر ماہانہ بنیاد پر 0.6 فیصد اضافے کی جانب بڑھ رہا ہے۔ فیڈرل ریزرو کے نسبتاً سخت مؤقف کے اشاروں نے ڈالر کو مضبوط کیا، جس سے دیگر کرنسی رکھنے والوں کے لیے ڈالر میں قیمت شدہ سونا مہنگا ہو گیا۔

عمان کی ثالثی میں جمعرات کو جنیوا میں امریکا اور ایران کے درمیان تہران کے جوہری پروگرام پر بات چیت میں پیش رفت ہوئی، تاہم طویل مذاکرات کے باوجود کسی بڑے بریک تھرو کے بغیر بات چیت ختم ہو گئی، جبکہ خطے میں وسیع فوجی تیاریوں کے باعث ممکنہ امریکی کارروائی کے خدشات برقرار ہیں۔

ادھر فیڈ چیئر کے نامزد امیدوار کیون وورش کی جانب سے فوری شرح سود میں کمی کے امکانات، جو صدر ڈونلڈ ٹرمپ کی توقعات سے ہم آہنگ سمجھے جا رہے تھے، امریکی معیشت کے بارے میں ابھرتے مثبت رجحان کے باعث محدود ہو سکتے ہیں۔

گزشتہ ہفتے بے روزگاری الاؤنس کے لیے نئی درخواستیں دینے والے امریکیوں کی تعداد میں معمولی اضافہ ہوا، تاہم فروری میں بے روزگاری کی شرح مستحکم دکھائی دی، جو لیبر مارکیٹ کے استحکام کی نشاندہی کرتی ہے۔

سی ایم ای کے فیڈ واچ ٹول کے مطابق مارکیٹس کو رواں سال فیڈ کی جانب سے 25 بیسس پوائنٹس کی تین ممکنہ کٹوتیوں کی توقع ہے۔

اسپاٹ چاندی 1.6 فیصد اضافے کے ساتھ 89.79 ڈالر فی اونس ہو گئی اور ماہانہ بنیاد پر 6.1 فیصد اضافے کی جانب گامزن ہے۔

اسپاٹ پلاٹینم 3.9 فیصد بڑھ کر 2,260.09 ڈالر فی اونس ہو گیا جبکہ پیلیڈیم 1.7 فیصد اضافے کے ساتھ 1,805.24 ڈالر تک پہنچ گیا۔