پاکستانی شوگر مل کا متحدہ عرب امارات میں ذیلی کمپنی قائم کرنے کا فیصلہ

جے ڈی ڈبلیو شوگر ملز لمیٹڈ جو چینی تیار کرنے والا ایک بڑا ادارہ ہے نے متحدہ عرب امارات (یواے ای) میں اپنی ایک ذیلی کمپنی قائم کرنے کے منصوبے کا اعلان کیا ہے۔

اسٹاک ایکسچینج میں رجسٹرڈ کمپنی نے منگل کو پاکستان اسٹاک ایکسچینج کو بھیجے گئے ایک نوٹس میں اس پیشرفت سے آگاہ کیا۔

نوٹس میں کہا گیا کہ جے ڈی ڈبلیو شوگر ملز لمیٹڈ کے بورڈ نے متحدہ عرب امارات میں مکمل ملکیتی ذیلی کمپنی قائم کرنے کی منظوری دے دی ہے۔ نوٹس میں مزید وضاحت کی گئی ہے کہ اس کمپنی کا قیام متعلقہ قوانین کی منظوری سے مشروط ہے۔

اعلامیے میں مزید کہا گیا کہ ذیلی کمپنی کے قیام سے کاروبار کے نئے مواقع میسر آئیں گے اور جے ڈی ڈبلیو شوگر کو اپنے اہداف زیادہ مؤثر اور بہتر انداز میں حاصل کرنے میں مدد ملے گی۔

پاکستانی کمپنیوں کے لیے متحدہ عرب امارات کا ایک پسندیدہ منزل کے طور پر ابھرنا دیگر عوامل کے ساتھ ساتھ وہاں کے سہل طریقہِ ادائیگی، سازگار کاروباری ماحول اور معاہدوں پر بہتر عملدرآمد کی مرہونِ منت ہے۔

متحدہ عرب امارات کو کئی شعبوں میں اعلیٰ درجہ حاصل ہے جن میں معاہدوں کا نفاذ اور بجلی حاصل کرنے کے معیار شامل ہیں۔

ماہرین کا ماننا ہے کہ متحدہ عرب امارات میں دفتر کا قیام پاکستانی کمپنیوں کو ایک اسٹریٹجک فائدہ فراہم کرتا ہے جس سے وہ ضروری انفرااسٹرکچر اور ایک مناسب قانونی ڈھانچے کے حامل عالمی مرکز سے بھرپور فائدہ اٹھانے کے قابل ہو جاتی ہیں۔

جے ڈی ڈبلیو شوگر ملز کو 1990 میں کمپنیز آرڈیننس 1984 کے تحت ایک پرائیویٹ لمیٹڈ کمپنی کے طور پر قائم کیا گیا تھا۔ 1991 میں اسے پبلک لمیٹڈ کمپنی میں تبدیل کر دیا گیا۔