ٹی20 ورلڈ کپ: بھارت کی فتح پر پاکستانی شائقین دل شکستہ

ٹی ٹوئنٹی ورلڈ کپ میں پاکستان کے خلاف بھارت کی یکطرفہ فتح پر کرکٹ کے شائقین اور سابق کھلاڑیوں نے سخت ردعمل ظاہر کیا ہے۔

پاکستانی شائقین اس طویل متوقع میچ میں بڑے مارجن سے شکست کے بعد دل شکستہ رہ گئے ہیں۔

بھارت نے کولمبو میں ہائی وولٹیج میچ میں پاکستان کے خلاف شاندار فتح حاصل کی، 176 رنز کے تعاقب میں قومی ٹیم صرف 114 رنز پر ڈھیر ہوگئی اور گرین شرٹس میچ 61 رنز سے ہار گئی۔

ذلت آمیز شکست پر سابق پاکستانی کرکٹ اسٹارز نے بھی اپنی مایوسی کا اظہار کیا ہے۔

سابق پی سی بی چیئرمین رمیز راجہ نے سوشل میڈیا پر اپنی مایوسی کا اظہار کرتے ہوئے اس کارکردگی کو خاص طور پر بیٹنگ کے حوالے سے تباہی قرار دیا۔ انہوں نے لکھا کہ بھارت نے پچھلے چند سالوں سے پاکستان کے خلاف مسلسل بولنگ اٹیک استعمال کیا ہے، پھر بھی پاکستانی بلے باز بہت ہی معمولی رہے اور بہتری کے کوئی واضح آثار نہیں دکھائے۔

سابق کرکٹر محمد یوسف نے ٹی20 اسکواڈ میں تبدیلی کی ضرورت پر زور دیا،ان کا کہنا تھا کہ سینئر کھلاڑیوں شاہین آفریدی، بابر اعظم اور شاداب خان کے لیے وقت ختم ہو گیا ہے۔ محمد یوسف نے کہا کہ پاکستان کو نئے ٹیلنٹ کی ضرورت ہے جو بڑے اسٹیج پر کارکردگی دکھا سکے، بجائے اس کے کہ کمزور حریفوں کے خلاف خالی جیتوں پر انحصار کیا جائے۔

سابق اوپننگ بلے باز احمد شہزاد نے قومی ٹیم کی کارکردگی پر تنقید کرتے ہوئے اسے مایوس کن اور پاکستان کرکٹ کے لیے اداس کہانی قرار دیا۔ سوشل میڈیا پر احمد شہزاد نے انتظامیہ پرشدید تنقید کی اور کہا کہ وہی پرانے نتائج حاصل کرنے کیلئے وہ مسلسل پرانے چہروں کو بار بار موقع دے رہے ہیں۔

انہوں نے حکام پر زور دیا کہ وہ قوم کو بیوقوف بنانا بند کریں اور ورلڈ کپ اسکواڈ میں فوری تبدیلی کی ضرورت پر زور دیا، خاص طور پر فخر زمان، نافع اور سلمان مرزا کو شامل کرنے کی سفارش کی۔