سی ڈی ڈبلیو پی نے 160ارب روپے کے 6 ترقیاتی منصوبوں کی منظوری دے دی

سینٹرل ڈویلپمنٹ ورکنگ پارٹی نے مجموعی طور پر 160ارب روپے مالیت کے ترقیاتی منصوبوں کی منظوری دے دی۔

جاری اعلامیہ کے مطابق وفاقی وزیر منصوبہ بندی احسن اقبال کی زیر صدارت سی ڈی ڈبلیو پی کا اجلاس ہوا جس میں صحت، ہائوسنگ اور ٹرانسپورٹ کے شعبوں سے متعلق منصوبوں کا تفصیلی جائزہ لیا گیا۔

اجلاس میں 8.5 ارب روپے مالیت کے 2 منصوبوں کی منظوری دی گئی جبکہ 151.7 ارب روپے کے 4 بڑے منصوبے حتمی منظوری کیلئے ایکنک کو ارسال کر دیئے گئے۔

اجلاس میں سندھ کے ہیومن کیپٹل 1000 ڈیز پروگرام کو بھی منظوری کیلئے ایکنک کو بھجوا دیا گیا، پروگرام کا مقصد ماں اور بچے کی صحت، غذائیت اور فیملی پلاننگ کی سہولیات کو بہتر بنانا ہے۔

پلاننگ کمیشن کے مطابق حیدرآباد اربن انفرااسٹرکچر ڈویلپمنٹ پیکیج کی منظوری دے دی گئی جبکہ کراچی اربن انفرااسٹرکچر ڈویلپمنٹ پیکیج کو بھی ایکنک کو ارسال کر دیا گیا ہے۔

علاوہ ازیں سندھ فلڈ ایمرجنسی اسسٹنس منصوبہ بھی منظوری کیلئے ایکنک کو بھجوا دیا گیا، جس کیلئے 87 فیصد فنڈنگ ایشین ڈویلپمنٹ بینک فراہم کرے گا۔ منصوبے کے تحت سیلاب سے متاثرہ اضلاع میں سڑکوں کی بحالی اور رابطہ نظام بہتر بنایا جائے گا۔

اجلاس میں بلوچستان میں لیاری سے لاکھڑا اور اتھل سے لاکھڑا بی ٹی روڈ کی بحالی کے منصوبے کی بھی منظوری دی گئی۔ منصوبہ لاکھڑا کو مکران کوسٹل ہائی وے سے منسلک کرے گا۔

ونڈر ڈیم منصوبے کا نظرثانی شدہ پی سی ون بھی منظوری کیلئے ایکنک کو ارسال کر دیا گیا۔ ڈیم کی تعمیر سے آبپاشی اور پانی ذخیرہ کرنے کی صلاحیت میں اضافہ ہوگا۔مزید برآں پبلک سیکٹر ڈویلپمنٹ پروگرام کے تحت 9 سیرت چیئرز قائم کرنے کی بھی منظوری دے دی گئی ہے۔