ملتان سلطانز ریکارڈ 2.45 ارب روپے میں ولی ٹیکنالوجیز کو فروخت

پاکستان سپر لیگ ( پی ایس ایل) کی فرنچائز ملتان سلطانز کو میڈیا، ٹیکنالوجی اور مالیاتی کمپنی ولی ٹیکنالوجیز کو ریکارڈ 2.45 ارب روپے میں فروخت کر دیا گیا، یہ نیلامی پیر کو لاہور میں منعقد ہوئی۔

نیلامی کے دوران میزبان فخرِ عالم نے بولی دہندگان کو بتایا کہ جیت کی رقم سالانہ فرنچائز فیس کا احاطہ بھی کرے گی اور یہ کامیاب بولی دہندہ کو آئندہ 10 سال کے لیے ملکیت کے حقوق فراہم کرے گی۔

تقریب سے خطاب کرتے ہوئے ولی ٹیکنالوجیز کے چیف ایگزیکٹو آفیسر احسن طاہر نے اعلان کیا کہ فرنچائز کو ری برانڈ کیا جائے گا اور ٹیم کا نام راولپنڈی رکھا جائے گا۔

احسن طاہر نے حاضرین سے کہا ہے کہ ”کیا آپ حیرت کے لیے تیار ہیں؟ ہم راولپنڈی کے لیے جا رہے ہیں۔“

پاکستان کرکٹ بورڈ ( پی سی بی) کے چیئرمین محسن نقوی نے ولی ٹیکنالوجیز کو کامیاب بولی پر مبارکباد دی اور فرنچائز کے تصور کو پیش کرنے والے سابق چیئرمین نجام سیٹھی کو خراج تحسین پیش کیا۔

محسن نقوی نے کہا کہ ”یہ فرنچائز نجم سیٹھی صاحب نے بنائی، جنہوں نے اس سفر کا آغاز کیا۔ ہمیں خوشی ہے کہ وہ آج ہمارے ساتھ موجود ہیں،“ اور سیٹھی کو اسٹیج پر مدعو کیا۔

نجم سیٹھی نے اس موقع پر اسے ایک طویل عرصے سے رکھے گئے وژن کے حقیقت بننے کے مترادف قرار دیا۔

انہوں نے کہا کہ ” میں یہاں آ کر خوش ہوں۔ یہ ایک خواب کا تکمیل ہے،“ اور خاص طور پر اس بات پر خوشی کا اظہار کیا کہ یہ تبدیلی محسن نقوی کے دور میں ہوئی۔

نجم سیٹھی نے ریکارڈ توڑ بولی کو پاکستان کرکٹ کے لیے ایک ”اہم سنگِ میل“ قرار دیا اور اشارہ دیا کہ پی ایس ایل کے علاوہ بھی آئندہ دنوں میں مزید مثبت پیش رفت کا اعلان کیا جا سکتا ہے۔

اپنی ویب سائٹ کے مطابق ولی ٹیکنالوجیز ایک عالمی کمپنی ہے جو میڈیا، مالیات اور ٹیکنالوجی کے شعبوں میں کام کرتی ہے۔ کمپنی نے پہلے پی ایس ایل کے لائیو اسٹریمنگ کے حقوق بھی اپنے اسپورٹس میڈیا پورٹ فولیو کے حصے کے طور پر حاصل کیے ہیں۔