امریکی ٹیرف میں کمی کے بعد نریندر مودی کا عبوری تجارتی معاہدے کا خیر مقدم

بھارتی وزیرِاعظم نریندر مودی نے ہفتے کو امریکہ کے ساتھ ہونے والے عبوری تجارتی معاہدے کا خیر مقدم کیا ہے۔ ان کا کہنا ہے کہ یہ معاہدہ عالمی ترقی کو تقویت دے گا اور دونوں ممالک کے درمیان اقتصادی تعلقات کو مزید گہرا کرے گا۔

معاہدے کے تحت بھارتی مصنوعات پر امریکی جوابی ڈیوٹی کو 25 فیصد سے کم کر کے 18 فیصد کر دیا گیا ہے اور بھارت نے امریکہ سے توانائی اور صنعتی سامان کی بڑی مقدار میں خریداری کا عہد کیا ہے۔

امریکی صدر ڈونلڈ ٹرمپ نے منگل کو اس ڈیل کا اعلان کرتے ہوئے کہا تھا کہ مودی نے یوکرین جنگ کے باعث روس سے تیل کی خریداری بند کرنے کا وعدہ کیا ہے۔

یہ معاہدہ بھارت کی جانب سے تیل کی خریداری پر مہینوں سے جاری کشیدگی کو کم کرتا ہے جس کے بارے میں واشنگٹن کا کہنا ہے کہ یہ اس جنگ کی مالی معاونت کررہی ہے جسے وہ ختم کرنے کی کوشش کررہا ہے۔ مزید برآں یہ معاہدہ صدر ٹرمپ اور اس شخص کے درمیان قریبی تعلقات کو بحال کرتا ہے جسے وہ اپنے بہترین دوستوں میں سے ایک قرار دیتے ہیں۔

مودی نے ہفتہ کو ایکس پر کہا کہ بھارت اور امریکہ کے لیے بہت بڑی خوشخبری! اور امریکی صدر ڈونلڈ ٹرمپ کی دوطرفہ تعلقات کو مضبوط کرنے کی ذاتی وابستگی کی تعریف کی۔

انہوں نے کہا کہ یہ معاہدہ ان کی شراکت داری کی بڑھتی ہوئی گہرائی اعتماد اور تحرک کی عکاسی کرتا ہے۔

مودی کے یہ ریمارکس صدر ٹرمپ کی جانب سے اس ایگزیکٹو آرڈر کے اجرا کے چند گھنٹے بعد سامنے آئے ہیں جس میں نئی دہلی کی جانب سے روسی تیل کی خریداری پر عائد اضافی 25 فیصد لیوی کو ختم کردیا گیا ہے، یہ قدم اس ہفتے اعلان کردہ تجارتی معاہدے پر عمل درآمد کی جانب ایک اہم پیش رفت ہے۔

وزیرِ اعظم مودی جنہیں ملک کے اندر بھارتی زرعی منڈیوں تک امریکہ کو رسائی دینے اور تیل کی درآمدات کی شرائط پر تنقید کا سامنا ہے، انہوں نے اپنے بیان میں روسی تیل کا کوئی ذکر نہیں کیا۔

انہوں نے مزید کہا کہ یہ فریم ورک مستحکم اور قابلِ اعتماد سپلائی چینز کو بھی مضبوط کرے گا اور عالمی ترقی میں اپنا حصہ ڈالے گا۔