جنوبی کوریا نے امریکا میں سرمایہ کاری میں تاخیر کے الزامات مسترد کر دیے

جنوبی کوریا کے وزیر خارجہ چو ہیون نے امریکی وزیر خارجہ مارکو روبیو کو یقین دہانی کرائی ہے کہ سیئول گزشتہ سال واشنگٹن کے ساتھ طے پانے والے تجارتی معاہدے کے تحت امریکی سرمایہ کاری سے متعلق خصوصی بل کی قانون سازی میں جان بوجھ کر تاخیر نہیں کر رہا۔ یہ بات یونہاپ نیوز ایجنسی نے جمعے کو رپورٹ کی۔

واشنگٹن میں جمعرات کو ایک پریس کانفرنس سے خطاب کرتے ہوئے چو ہیون نے بتایا کہ انہوں نے اسی ہفتے امریکی وزیر خارجہ سے ملاقات کے دوران اس معاملے پر تفصیلی گفتگو کی۔ ان کے مطابق جنوبی کوریا معاہدے کے تحت امریکہ کی اہم صنعتوں میں 350 ارب ڈالر کی سرمایہ کاری کے وعدے کو پورا کرنے کے لیے پُرعزم ہے اور اس سلسلے میں حکومت کی نیت پر کوئی شک نہیں ہونا چاہیے۔

یونہاپ کے مطابق، وزیر خارجہ چو ہیون نے کہا کہ مارکو روبیو نے انہیں آگاہ کیا کہ جنوبی کوریا کی جانب سے معاہدے پر عملدرآمد کے حوالے سے واشنگٹن میں مجموعی فضا سازگار نہیں ہے۔ امریکی حکام کو خدشہ ہے کہ قانون سازی میں تاخیر سے معاہدے پر عمل متاثر ہو سکتا ہے۔

واضح رہے کہ بدھ کے روز جنوبی کوریا کے قانون سازوں نے اعلان کیا تھا کہ وہ 9 مارچ تک اس خصوصی قانون سازی کو حتمی شکل دے دیں گے تاکہ امریکی سرمایہ کاری کے منصوبوں کو عملی جامہ پہنایا جا سکے۔ یہ اعلان ایسے وقت میں سامنے آیا جب امریکی صدر ڈونلڈ ٹرمپ نے جنوبی کوریا پر دباؤ بڑھاتے ہوئے کورین مصنوعات پر ٹیرف بڑھانے کی دھمکی دی اور قانون سازی میں تاخیر کا الزام عائد کیا۔

تجزیہ کاروں کے مطابق، جنوبی کوریا اور امریکہ کے درمیان یہ معاہدہ دوطرفہ معاشی تعلقات میں ایک اہم سنگ میل سمجھا جاتا ہے، اور اس پر بروقت عملدرآمد دونوں ممالک کے لیے نہایت اہم ہے۔ قانون سازی کی تکمیل کے بعد سرمایہ کاری کے بڑے منصوبوں کے آغاز کی توقع کی جا رہی ہے۔