قازقستان کی پاکستان کے ساتھ خوراک، زراعت اور ادویات سازی کے شعبوں میں مشترکہ منصوبوں میں دلچسپی

قازقستان نے بدھ کو فوڈ پروسیسنگ، زرعی ویلیو چینز اور ادویات سازی کے شعبوں میں مشترکہ منصوبے شروع کرنے میں گہری دلچسپی کا اظہار کیا ہے۔

اسلام آباد میں وفاقی وزیرتجارت جام کمال خان سے قازقستان کے ہم منصب ارمان شقلیئیف نےملاقات کی۔

جاری کردہ اعلامیے کے مطابق دونوں اطراف نے دوطرفہ تجارت کی موجودہ صورتحال کا جائزہ لیا اور اقتصادی تعاون، رابطوں اور سرمایہ کاری کو وسعت دینے کے لیے ٹھوس ذرائع پر تبادلہ خیال کیا۔

ملاقات کے دوران دونوں وزراء نے پاکستان اور قازقستان کے اقتصادی تعلقات کو محض امکانات سے نکال کر عملی کارکردگی میں بدلنے کے مشترکہ عزم کا اعادہ کیا۔ اس سلسلے میں مواصلاتی رابطوں، سرمایہ کاری پر مبنی ترقی اور علاقائی یکجہتی پر بھرپور توجہ مرکوز کی گئی۔

انہوں نے اس اعتماد کا اظہار کیا کہ مستقل ادارہ جاتی ہم آہنگی اور نجی شعبے کی شمولیت آنے والے سالوں میں دوطرفہ تجارت اور سرمایہ کاری میں نمایاں اضافہ کرے گی۔

ملاقات میں پاکستان اور وسطی ایشیا کے درمیان رابطوں کی رکاوٹوں کو دور کرنے اور دونوں ممالک کے درمیان تجارت کی مکمل صلاحیتوں کو بروئے کار لانے کے لیے عملی حل تلاش کرنے پر تفصیلی غور کیا گیا۔

پریس ریلیز میں بتایا گیا کہ دونوں ممالک نے اس بات پر اتفاق کیا کہ ریل، سڑک اور ملٹی موڈل (کثیر المقاصد) رابطوں میں بہتری پاکستان اور قازقستان کے درمیان تجارت کو مضبوط بنانے اور پائیدار و طویل مدتی اقتصادی تعاون کو ممکن بنانے کے لیے بنیادی اہمیت رکھتی ہے۔

قازق وزیر نے بڑے انفرااسٹرکچر منصوبوں، بالخصوص ریلوے اور روڈ راہداریوں کی ترقی کی تزویراتی اہمیت پر زور دیا۔ انہوں نے اس بات پر بھی نوٹ کیا کہ اس طرح کے اقدامات سے تقریباً 5 ارب امریکی ڈالر مالیت کی تجارت اور سرمایہ کاری کی راہ ہموار ہو سکتی ہے، جبکہ روزگار کے مواقع پیدا ہوں گے اور علاقائی سپلائی چینز کو بھی استحکام ملے گا۔