ترک فوج کے سربراہ کی جی ایچ کیو میں چیف آف آرمی اسٹاف جنرل عاصم منیر سے ملاقات

ترک جنرل اسٹاف کے سربراہ جنرل سیلجوک بائراک تروغلو نے جمعہ کو جنرل ہیڈ کوارٹرز (جی ایچ کیو) میں چیف آف آرمی اسٹاف اور چیف آف ڈیفنس فورسز (سی ڈی ایف) فیلڈ مارشل سید عاصم منیر سے ملاقات کی۔جی ایچ کیو آمد پر پاکستان کی مسلح افواج کے چاق و چوبند دستے نے ترک فوجی سربراہ کو گارڈ آف آنر پیش کیا۔

پاک فوج کے شعبہ تعلقات عامہ کے مطابق ملاقات کے دوران دونوں جانب سے باہمی دلچسپی کے امور، موجودہ علاقائی و عالمی سیکیورٹی کی صورتحال اور دوطرفہ دفاعی و فوجی تعاون بڑھانے کے امکانات پر تبادلہ خیال کیا گیا۔ دونوں شخصیات نے پاک ترکیہ تعلقات کی موجودہ سمت پر اطمینان کا اظہار کیا اور قریبی ہم آہنگی برقرار رکھنے سمیت دفاعی تعاون کو وسعت دینے کی اہمیت پر زور دیا۔

فیلڈ مارشل عاصم منیر نے مشترکہ تاریخ، باہمی اعتماد اور مضبوط عوامی تعلقات پر مبنی پاکستان اور ترکیہ کے درمیان دیرینہ برادرانہ تعلقات کو اجاگر کیا۔ انہوں نے ترک مسلح افواج کے مسلسل تعاون کو سراہا اور فوجی تعلقات کو مزید مضبوط بنانے کے لیے پاکستان کے عزم کا اعادہ کیا۔

جنرل بائراک تروغلو نے پرجوش استقبال پر پاکستانی قیادت کا شکریہ ادا کیا اور مسلح افواج کی پیشہ ورانہ مہارت کی تعریف کی۔ انہوں نے تربیت، مشترکہ مشقوں اور استعداد کار بڑھانے کے اقدامات کے ذریعے دفاعی تعاون کو مزید گہرا کرنے کے ترکیہ کے عزم کو دہرایا۔

آئی ایس پی آر کے مطابق یہ دورہ پاکستان اور ترکیہ کے درمیان پائیدار اسٹریٹجک شراکت داری اور علاقائی امن، استحکام اور سلامتی کے لیے ان کے مشترکہ عزم کی عکاسی کرتا ہے۔