پیکیجز لمیٹڈ نے آئی ایف سی کے 20 لاکھ پریفرنس شیئرز کی واپسی کی منظوری دے دی

پاکستان میں پیپر اور بورڈ کی سب سے بڑی پیداواری کمپنی پیکیجز لمیٹڈ نے بدھ کو بتایا کہ اس نے واشنگٹن ڈی سی میں قائم انٹرنیشنل فنانس کارپوریشن (آئی ایف سی) کی درخواست پر اس کے زیرِ ملکیت 20 لاکھ پریفرنس شیئرز/کنورٹیبل اسٹاک کی ریڈمپشن کی منظوری دے دی ہے۔

لسٹڈ کمپنی نے یہ پیشرفت بدھ کو پاکستان اسٹاک ایکسچینج کو نوٹس میں جاری کی۔

ریڈیمپشن نوٹس ایک ایسی اطلاع ہے جو سرمایہ کاروں کو آگاہ کرتی ہے کہ جاری کنندہ ترجیحی حصص کی میعاد ختم ہونے کی تاریخ سے پہلے انہیں واپس خریدنے یا ختم کرنے کا اپنا حق استعمال کررہا ہے۔

لسٹڈ کمپنی نے بتایا کہ بورڈ نے کمپنی کے چیف ایگزیکٹو آفیسر اور چیف فنانشل آفیسر کو اس بات کا اختیار بھی دے دیا ہے کہ وہ آئی ایف سی کے ساتھ حصص کی واپسی کی قیمت کے حوالے سے مذاکرات کریں اور باہمی رضامندی سے اسے طے کریں۔

کمپنی کے مطابق اس وقت 8,186,842 پریفرنس شیئرز/کنورٹبل اسٹاک واجب الادا ہیں جو 25 مارچ 2009 کے سبسکرپشن معاہدے کے تحت آئی ایف سی کو جاری کیے گئے تھے۔

اس سے قبل جنوری میں، پیکیجز لمیٹڈ کو انٹرنیشنل فنانس کارپوریشن کی جانب سے اس کے واجب الادا پریفرنس شیئرز کے ایک حصے کی واپسی کا نوٹس موصول ہوا تھا۔

پیکیجز لمیٹڈ پاکستان میں رجسٹرڈ ایک پبلک لسٹڈ کمپنی ہے۔ یہ کمپنی 1957 میں پاکستان کے علی گروپ اور سویڈن کے آکرلنڈ اینڈ راؤسنگ کے درمیان ایک مشترکہ منصوبے کے طور پر قائم کی گئی تھی۔

ابتدا میں پیکیجز لمیٹڈ کاغذ اور پیپر بورڈ کو کنزیومر انڈسٹری (صارفین کی صنعت) کے لیے پیکیجنگ میں تبدیل کرنے کے کام سے وابستہ تھی۔